“Pal territoriu ye ruina y l’impautu sobre la biodiversidá, altísimu; nun se pueden poner aeroxeneradores en cualquier sitiu”, afirma Ernesto Díaz

|
Parque eólicu de Capieḷḷamartín

La campaña ‘Aquí no’, entamada pola Plataforma para la Defensa de la Cordillera Cantábrica col sofitu de más d’un centenar d’entidaes, ta teniendo una repercusión importante en redes. “Tamos a favor de les renovables, pero éstes nun se pueden poner en tolos sitios”, defende Ernesto Díaz, coordinador d’esta asociación.

Asturies cuenta nestos momentos con 20 parques d'aeroxenaradores, con 470 molinos funcionando, a los qu'hai que suma otros 20 en tramitación en diferentes fases y los que s’esperen. Dalgunos d’ellos verdaderos ataques ambientales, como, ente los primeros n’instalase nel país hai dos décades, el de L’Altu’l Palu, n’Ayande, y el de Bixega, en Miranda, “en zona de pasu de faisán montés el primeru y zona osera, el segundu”, recuerda Díaz.

L’aprobación recién del Plan Nacional Integrado de Energía y Clima (PNIEC), que pretende reducir un 23 por cientu les emisiones de gases ivernaderu y que l’Estáu algame la neutralidá climática nel 2050, “va provocar nos meses y años próximos l’apaición de decenes de proyeutos. En tol Cordal hai anguaño unos 100 en diferentes fases”, contabiliza’l coodinador de la Plataforma, que tien como ámbitu d’actuación mayormente los territorios que conformen la cordelera, dende Galicia a Navarra, incluyendo tamién Zamora.

Ye por esti motivu pol que naz ‘Aquí no’, qu’echó a andar con un manifiestu asoleyáu en payares al qu’acompaña agora un videu, que se ta convirtiendo viral en redes sociales, nel que s’esplica les razones que defende la campaña xunto con una representación de la sociedá civil. Ente ellos, dos qu’usen l’asturianu, el cantante Nacho Vegas y l’abeyeiro Alberto Uría.

“El PNIEC llega tarde, por un tirón d’oreyes de Bruxeles, y fíxose rápido, lo que pue trayer unes consecuencies malísimes. Les coses que se faen d’aquella manera suelen facese mal”, asegura Díaz. “Aporten munchos proyeutos en tol Cordal que traen mui pocu beneficiu pa la población. Les grandes compañíes llévenlos a terrenos despoblaos porque paguen poco pol usu del terrén, pero les consecuencies son importantes pal entornu”, recuerda.

Asina cita’l gran impautu que provoca l’apertura de les pistes forestales o los tendíos llétricos. “Pal territoriu ye ruina y l’impautu sobre la biodiversidá ye altísimu; nun se pueden poner parques d’aeroxeneradores en cualquier sitiu”, añade.

Son pocos los territorios vírxenes que nos queden, ensin accesos, onde hai fauna non avezada al contautu col ser humanu, amenazada agora por estos proyeutos. Según espliquen dende l’asociación con sede en Llugones, miles de páxaros y esperteyos finen por causa de los aeroxeneradores, asina como un númberu incalculable d’invertebrados, y los parques corten el pasu de los vertebraos.

La zonificación del ministeriu, non venceyante

N’avientu’l Ministeriu pa la Transición Ecolóxica y el Retu Demográficu presentó’l documentu ‘Zonificación ambiental pa enerxíes renovables: Eólica y Fotovoltaica’, nel qu’identifica les árees con mayor o menor sensibilidá ambiental p’asitiar parques d’estes renovables, “col problema de que nun venceyante; nun obliga”. “Tamos a favor de les renovables, pero éstes nun se pueden poner en tolos sitios”, insiste Díaz, que defende que’l Cordal ha de quedar fuera de la implantación d’estos nuevos complexos eólicos porque “la transición enerxética ha de ser ecolóxica y xusto col mediu ambiente y la sociedá nel so conxuntu”.

Les competencies de la ordenación del territoriu tiénenles les comunidaes autónomes y, amás del manifiestu, dellos coleutivos, ente ellos la Plataforma n’Asturies, solicitaron moratories en delles pa ganar tiempu pa la ellaboración d’una Evolución Ambiental Estratéxica. “Ha de facese una planificación territorial y una zonificación, decidir ónde sí y ónde non pue haber parque d’aeroxeneradores”, demanda Díaz.

De momento, mientres sigue trabayando en concienciar a la sociedá sobre esta situación qu’han d’afrontar yá tanto Asturies como otros territorios del Estáu, la Plataforma para la Defensa de la Cordillera Cantábrica consiguió un aconceyamientu con personal del ministeriu. Ésti va tener llugar mañana de manera telemática y nél l’asociación va esponer, con datos, los sos argumentos.

Na semeya, el parque eólicu en construcción en Capieḷḷamartín (Valdés).

AdxuntuTamañu
PDF icon Manifiestu 'Aquí no'251.43 KB
Contador Estadistiques