Pagáronse mas de 4.000 euros pol meyor quesu Cabrales

El XXXVII Certame del Quesu Cabrales celebráu esti fin de selmana n'Arenas remató cola puya pol quesu ganador, que resultó ser el d'Ana Rosa Bada Herrero, de la Quesería "Los Puertos", de Po. La cifra final na puya algamó los 4.206 euros, pagaos pol Restaurante Casa Tista de Ribeseya. Pela so parte Juan José Bada Herrero y José Bada Herrero fueron los segundos y tercer premiaos, respectivamente, y los sos quesos compraos pol Centru Cabraliegu de Bruseles por 900 y 600 euros.

Esta cita, yá clásica nel branu asturianu, axunta a productores y consumidores del quesu Cabrales nuna xornada festiva que sirve d'amuesa pa lo meyor de la producción artesana del quesu mas famosu del nuesu país.Un productu con denominación d'orixe dende l'añu 1981 y que se fai nos conceyos de Cabrales y Peñamellera Alta a partir de lleche de vaca esclusivamente o amestando-y d'oveya y cabra.