Pablo Rodríguez Medina gana’l concursu de cuentos de “El Garrapiellu”

L'escritor entreguín Pablo Rodríguez Medina ye'l ganador de la XVI edición del Concursu de Cuentos Curtios qu'organiza la Tertulia Cultural "El Garrapiellu" de Xixón pol so relatu "Graziela con zeda". Dotáu con 900 euros pal primer premiu, esti concursu entrega tamién un accésit de 300 euros que foi pal autor Sidoro Villa Costales, pol cuentu "Escuridá".



Pablo Rodríguez Medina (L'Entregu, 1978) ye llicenciáu en Filoloxía Española y especialista en Filoloxía Asturiana. Les sos obres, tanto en llingua asturiana como castellán, algamaron bien de premios tanto n'Asturies como fuera d'ella. Ente los premios n'asturianu hai que destacar el Premiu Xosefa Xovellanos de novela nel añu 2001 con 'L'arna de San Atanás' (Ediciones Trabe, 2002) o'l Premiu de Creación Lliteraria 'Llorienzu Novo Mier' de l'Academia de la Llingua Asturiana, con 'Les vueltes, toles vueltes' (Llibrería Académica, númberu 32) amás d'otros reconocimientos nel campu específicu de la poesía, onde consiguió'l Teodoro Cuesta col poemariu "Aires de mudanza".