Pablo Acebal devuelve al Llangréu a Segunda División B

|
Un penalti forciáu y marcáu por Pablo Acebal devolvió al UP Langreo a Segunda División B tres 11 años en Tercera. Los azulgrana superaron al Mérida AD nun Ganzábal enllenu, con más de 4.000 espectadores nes graes.
 
Tres l’Atlético Monzón y l’Haro, la segunda refundación del Mérida que tuvo en Primera na década de los 90 yera’l rival últimu enantes de dar el saltu de categoría. Los de Pablo Lago llegaben al partíu del vuelta tres amarrar un empate ensin goles nel Romano énte 10.000 aficionaos emeritenses y Ganzábal diba, per tercer vegada, a dictar sentencia. Los siguidores llocales respondieron, enllenaron per primer vegada’l campu dende la so reinauguración nel 2006, y emburriaron al so equipu hacia la victoria. Ésta llegaría nel minutu 77, cuando Pablo Acebal fixo un control orientáu nun cambiu de xuegu, ganó por velocidá al so par y vio cómo’l so centru posterior yera frenáu cola mano por Mansilla. Penalti nidiu que’l canteranu de Mareo encargaríase de marcar.
 
Quedaben poco más de diez minutos per delantre y el Mérida, que namái protagonizara una xugada realmente peligrosa, momentos enantes del descansu, que desbarató Guillermu en primer instancia y Otero y el palu, en segunda, necesitaba marcar p’algamar el cambiu de categoría. El partíu tornóse bruscu, lo que benefició a los llocales, que tuvieron ocasiones a la contra pa sentenciar tres la espulsión por agresión del visitante De la Cruz. Al final, l’allegría quedó en casa y Llangréu foi una fiesta pol retornu del so equipu a la categoría mínima que, por historia y potencial, merez l’equipu azulgrana.
 
La direutiva llangreana presidida por Ana Belén Pacho va principiar agora la planificación de la plantiya que va competir nuna Segunda B da marcáu saborgu asturianu al contar con seis equipos del país –Uviéu, Avilés, Marino, Sporting B, Lealtad y Llangréu–, que podríen ser siete nel casu de que’l Caudal caltenga nos despachos la categoría. Precisamente l’equipu mierense sueana como posible destín de Pablo Lago, que tenía un principiu d’alcuerdu pa entrenar al Uviéu de División d’Honor xuvenil. Ún de los que suenen pa dirixir al Llangréu la temporada próximu ye José Antonio Redondo, hasta’l momentu téunicu de L’Entregu.
 
Hai que destacar que col ascensu del Llangréu salen beneficiaos el Mosconia, que retorna a Tercera; el Raíces, que xube a Preferente; y l'Atlético Camocha, que fai lo propio a Primera Autonómica.
 
Incidentes enantes y depués del partíu
 
La nota negativa del partíu ente asturianos y estremeños foron los incidentes qu’hebo enantes y depués del alcuentru. Miembros de Legiones Sur, grupu ultra visitante, atacaron a aficionaos normales del Llangréu que taben nos establecimientos hosteleros de la redolada de Ganzábal esperando a la hora del partíu y provocaron dellos estrozos de mobiliariu, al igual que posteriormente dientro del campu del fútbol. Tres el pitíu final, los incidentes treslladáronse al terrenu de xuegu ente los hinches del Llangréu y los ultres emeritenses, lo qu’obligó a intervenir a los pocos efeutivos policiales presentes nel campu llangreanu.
 
 
Contador Estadistiques