Ovidio Sánchez pide un “estatutu de máximos”

El representante del PP nel Debate d'Orientación Política de la Xunta xeneral del Principáu, Ovidio Sánchez, pidió-y a Vicente Álvarez Areces, que reflexone y exerza'l "diálogu" nel Parlamentu asturianu. En casu contrariu, Sánchez dixo que'l gobiernu socialista sólo va poder ofrecer "inseguridá" y "ineficacia" a los asturianos, dao que nun tien la mayoría suficiente pa sacar alantre les sos iniciatives.

"Nun mos sirve qu'agora, dempués d'ocho años, mos convoque a un conceyu", dixo Sánchez, en referencia al ofrecimientu previu p'Areces. El dirixente popular dixo que l'actual situación política na Xunta Xeneral del Principáu esixe "cintura, tolerancia y mentalidá abierta". Frente a eso, dixo qu'Areces recurrió al "sectarismu, la preopotencia y el discursu de partíu".

Señaló que si Areces tenta d'imponer el so programa con un presupuestu "de partíu" diba tar recurriendo a un exerciciu "suicida" ensin sentíu nengún. En tou casu, Sánchez esplicó que si recurre al diálogu va tener "receptividá" nel PP. Al so xuiciu, el Gobiernu formáu por Areces ye "improvisáu" y "agotáu" enantes d'entamar el so llabor. Dixo que l'únicu destacáu del Executivu socialista ye "el so tamañu esaxeráu".
Esplicó que de 79 altos cargos, pasóse a 94 y que de 13 cargos d'alta dirección pasóse a más de 36. Comentó que la suma del so personal de confianza pasa de 92 puestos a 130. "Güei la suma d'altos cargos, gabinetes y xerentes d'empreses y fundaciones públiques da requexu a más de 300 compañeros del PSOE", apuntó Sánchez, que dixo que más qu'un gobiernu paecía una "axencia de colocación y recolocación".

Sobre la futura reforma del Estatutu d'Autonomía, Sánchez reclamó un "documentu máximu" d'autogobiernu, fuera de la "tensión electoral que provoquen unes elecciones" y matizó que'l procesu tien de llevase "ensin priesa, pero ensin pausa". Como requisitos fundamentales pal documentu final, Sánchez esixó'l máximu consensu na Xunta Xeneral del Principáu, busca de la solidaridá ente tolos españoles, financiación multillateral y perfectu que la reforma concueye cola constitución. Ensin facer referencia a cuestiones identitaries o a la llingua asturiana, Sánchez reclamó p'Asturies un Estatutu d'Autonomía "de primera" qu'estableza que los asturianos "nun son nin más nin menos que naide y que nunca contribuya a la rotura del marcu constitucional actual".