Ovidio Sánchez diz que va siguir encabezando'l PP

Dempués del torbolín de declaraciones de dirixentes del PP asturianu qu'aseguraben que yera preciso entamar una renovación dientro de la organización sostituyendo a Ovidio Sánchez dempués del resultáu electoral de la formación conservadora nes elecciones del 27 de mayu, l'interesáu dio ayeri, a la vuelta de les vacaciones que garró en pasando les votaciones, un mensaxe de tranquilidá y continuidá. Sánchez afirma que "nun va haber cambeos nel PP" y adelanta que va presentase a la reelección nel próximu congresu del PP asturianu, un congresu qu'entovía nun tien fecha acutada y que depende de que se faiga primero'l congresu del partíu a nivel español.

Lloñe de les crítiques de figures del partíu como l'históricu alcalde de Navia Manuel Bedia, Sánchez cenmtró la so reapaición en comentar lo positivo de los resultaos electorales del pasáu 27 de mayu, qu'aseguró que definen un espaciu de centru cada vegada más fuerte n'Asturies, sobremanera nel centru. Tocante a la parte d'autocrítica, Sánchez llamentó los resultaos del PP a nivel de conceyos, onde perdió alcaldíes simbóliques como la de Navia o la de Ribesya. El líder del PP ofrecióse tamién a la FSA pa llegar a pautos puntuales col oxetivu de que'l gobiernu de coalición que seguramente va salir de les negociaciones ente socialistes y IX-BA-LV "nun se convierta nun rehén" d'esta coalición.