Ovidio Sánchez afirma que l’asturianu "nun ye competitivu nun mundu globalizáu"

El candidatu del Partíu Popular a les próximes elecciones a la Xunta Xeneral, Ovidio Sánchez, dio una entrevista a la emisora de TV "Canal 10". Nel trescursu de la mesma Sánchez defendió una xestión compartida de la sanidá col sector priváu p'acabar coles llistes d'espera. El líder del PP adelantó otres promeses electorales como van ser la educación de baldre hasta los 18 años y la retirada del tramu autonómicu del impuestu sobre los carburantes, ente otros puntos de rebaxa fiscal.

No tocante a educación, los populares defenden tamién l'impulsu a la creación de centros billingües qu'enseñen en castellanu y n'inglés. Ovidio Sánchez declaróse na entrevista partidariu de que la llingua asturiana siga na mesma situación que tien agora, y xustificó la so postura argumentando que "Creemos que ye necesario utilizar los instrumentos de protección pal asturianu, pero tamién consideramos que ye poco competitivu nun mundu globalizáu".

Sobre l'Estatutu d'Autonomía, Sánchez declarose partidariu de "buscar el meyor momentu" pa facer la so reforma y rechazó pidir p'Asturies "el máximu nivel d'autogobiernu" llendando los conteníos de la reforma al llogru d'una "España vertebrada". El presidente del PP enfotóse nel llogru de la mayoría absoluta en mayu y nun descartó un posible pautu de gobiernu con Unión Asturianista en casu de qu'esta formación llogre entrar na Xunta Xeneral.