El conxuntu Os Folkgazais asoleya un videoclip del cantar ‘Desafío' perteneciente al EP 'Alorias'

La banda veigueña Os Folkgazais ta acabante d’asoleyar un videoclip del cantar ‘Desafío’, perteneciente al so trabayu últimu, ‘Alorias', un EP compuestu por cinco temes. Objetivo 7 encargóse de la producción.

‘Desafío’ trátase d’un blues con música d’Abel Pérez que tien como lletra un poema en castellanu d’Héctor Acebo que la banda adaptó a la forma más occidental del gallego-asturiano por pidimientu propiu del autor tres solicita-y permisu pa la so utilización como cantar. Nél destaca la collaboración del cantante de Blues & Decker, Gustavo Pérez Álvarez, xixonés criáu en Foz, que pon la voz al cantar xunto cola vocalista d’Os Folkgazais, Ruth Martín, formando un dúu vocal mui potente. Nesi sen, hai que destacar que Pérez Álvarez nun apaez nel videoclip, grabáu nel bar Avión d’A Veiga.

Os Folkgazais trátase d’un formación d'ocho músicos asturianos y gallegos que s’inspira nes bandes que nacieron alredor de la década de los 40 nel occidente del país a mou de pequeñes orquestes influenciaes poles ‘jazz band’ estauxunidenses, interpretando sones y ritmos nuevos. Nacida n’A Veiga nel 2007 y col gallego-asturiano como llingua de los sos cantares, tien espublizaos hasta la fecha trés trabayos, los discos ‘Cama de folkga’ y ‘Haiga’, y l’EP ‘Alorias’, del que forma parte’l cantar ‘Desafío’. Ésti ta compuestu por cuatro temes más: ‘Casiñas blancas’, ‘Paxarela’, Déixame ir contigo’ y ‘As palabras de debo’.