Organizaciones contraries a la Llei d’Enseñanza convoquen una manifestación el día 22

Anque'l Congresu yá aprobó la Llei Orgánica d'Enseñanza, delles organizaciones asturianes siguen movilizándose contra una llei que-yos abulta una puerta abierta a la privatización del sistema educativu y contra la que ven preciso movilizase enantes de que se faigan los desarrollos autonómicos de los sos mandaos. Ente les organizaciones convocantes tan los sindicatos SUATEA, CGT y CSI, los partíos políticos Izquierda Xunida, Izquierda Asturiana, Bloque por Asturies y PCPE y otres organizaciones como'l Sindicatu d'Estudiantes o Aula Xoven o Sindicatu d'Estudiantes.

Una manifestación que va salir el 22 de febreru de la plaza l'Umedal de Xixón va ser el puntu cimeru de les reivindicaciones que les organizaciones al favor de la escuela publica van facer contra la Llei Educativa. Primero d'ello van facese otros actos pa calecer l'ambiente, ente ellos la charra "por qué dicimos non a esta llei" con Jose María Rozada que va dase'l xueves día 9 de febreru a les 7 nel salón actos de la Biblioteca Xovellanos de Xixón o l'actuación teatral que va facese'l día 15 n'Uviéu nel IES Alfonso II a les 7 de la tarde col títulu "el cuentu de la LOE" amás de dellos actos sorpresa.


Les organizaciones convocantes nun tan d'alcuerdu cola Llei d'Enseñanza que llevó alantre'l PSOE, y anque la Llei yá ta aprobada y amás con mayoría más qu'absoluta en Congresu, camienten qu'hai motivu pa siguir movilizándose contra ella. Jesús de La Roza, del sindicatu d'enseñanza SUATEA comentó a Asturies.com que "el desenvolvimientu de la Llei pue facer que vaya a peor" en cuantes que "munchos de los sos desarrollos han facese dientro de les alministraciones autonómiques y hai que vixilar esos desarrollos, que de mano albidramos que nun van ser bonos pa la escuela pública".


De la Roza diz que "Esta nun ye la llei que prometíen nel programa electoral onde falaben de la escuela publica como exe vertebrador de la enseñanza" y camienta que la Llei va contra la mesma Constitución "que nel so artículu 27.5 apauta que sían los poderes públicos los que se faigan cargu del derechu a la educación" mientres que pal sindicalista "la Llei pervierte esti mandáu constitucional yá de mano nuna cuestión nominal al convertir el derechu nun serviciu públicu d'educación". Inda más "la Llei apauta qu'esti serviciu puea prestase tanto pola escuela publica como polo que se llama nella "entidaes d'iniciativa social" como diz nel artículu 108, lo que ye un eufemismu pa referise a les empreses de la educación". Ello supón pal sindicalista una "Dexación de funciones pergrave y dende'l puntu de vista ideolóxicu una renuncia a garantizar un derechu fundamental" siendo lo mesmo que "poner al raposu a guardar el piteru".

De la Roza alvierte que'l redactao final de la llei comparáu col anteproyectu ye incluso mas sangrín, y asina "n'Asturies hai 210 unidaes d'educación infantil de 3 a 6 años sobre les que la llei pasó de dicir de mano que podríen concertase a dicir que diben concertase colo que les empreses puen esixir que se-yos faiga conciertu". La crítica de De la Roza a la Llei d'Enseñanza llega tamién a cuestiones más nidies d'atalantar a primer vista al alvertir que "La llei afita que quien se matricule nun concertáu ha respetar l'ideariu del centru, y tamién manda qu'en cuantes qu'entame'l cursu estos centros nun tienen obligación d'almitir mas alumnos" dalgo que pal representante de SUATEA faise a costafecha "pa qu'estos centros nun tengan qu'almitir neños, nos más de los casos inmigrantes, que lleguen col cursu yá entamáu" aportando'l datu de que n'Asturies n'asturies hebo 400 demandes de matriculación col cursu ya entamáu. De la Roza califica estes midíes de "llexitimar la segregación y afalar un enclín peligrosu de les clases medies y medies altes que tan echándose a la concertada porque, anque nun se reconoz por corrección política, nun quieren que los sos fíos vayan a clase con inmigrantes". El dirixente sindical condenó tamién la xuba de financiación a la concertada y el que "se consienta qu'esta cobre amás baxo manga al traviés d'actividaes estraescolares, que ye como llexitimar el conceptu de desgaste de patiu".