Opiniones enfrentaes énte'l proyectu pa una central térmica n’Avilés

El proyectu de la empresa Isolux quier aprovechar les instalaciones de la térmica d'Ensidesa, onde taba previsto facer un muséu. Grupos ecoloxistes refuguen la idea, que supondría duplicar la potencia instalao n'Asturies

La central térmica d'Ensidesa en Valliniello, inaugurada en 1957, peslló definitivamente l'añu pasáu, pasando a manes de la Sociedá Estatal de Participaciones Industriales a la espera de que l'Ayuntamientu d'Avilés y la Conseyería de Cultura desarrollen pal edificiu un proyectu cultural que s'anunció nel branu del 2004 como "l'apueste más fuerte de la Conseyería de Cultura n'Avilés na llexislatura".

Esa instalación cultural, pa la que nunca se llegaron a concretar los conteníos, podría agora pasar a la historia como otru gran proyectu non realizáu énte l'anuncia del Conseyeru d'Industria Graciano Torre, que confirmó oficialmente esta selmana la esistencia de negociaciones col grupu Isolux, ún de los mayores grupos d'inxeniería españoles, pa la construcción n'Avilés d'una planta térmica con dos grupos a gas de ciclu combináu y 400 mw de potencia caún. Pa poner estos grupos, la empresa promotora quier aprovechar lo menos en parte, les instalaciones de la térmica de valliniello, que dispón d'un complicáu sistema d'evacuación y enfriamientu de vapor que podría reutilizase pa los grupos nuevos.

A la espera de más reuniones cola empresa por parte de la Conseyería y de l'autorización del proyectu por parte del Ministeriu d'Industria, la térmica nueva p'Avilés tien el preste de toles instituciones empresariales del conceyu, entamando pela Cámara de Comerciu, y despierta munchu enfotu nel principáu en cuantes que supón un sofitu más a la demanda d'una regasificadora pal Musel. Sicasí, el proyectu d'Isolux tien un enemigu declaráu nel movimientu ecoloxista, que protestó al poco de conocese la noticia.

Asina, el Colectivu Ecoloxista d'Avilés ve "poco lóxico" que nuna comarca tan altamente contaminada como Avilés se ponga un grupu térmicu nuevu dempués de que pesllare'l d'Ensidesa. Anque'l gas contamina menos que'l carbón, los ecoloxistes remembren que la zona propuesta pa la instalación d'Isolux ta a menos 500 metros de la ciudá d'Avilés, que tendría de soportar emisiones d'óxidu de nitróxenu, gas precursor de la formación d'ozonu troposférico, un axente que daña'l sistema respiratoriu y el cardiovascular y que, cuando s'amiesta cola humedá crea ácidu nítrico, responsable de la lluvia ácido.

El grupu conservacionista denuncia que se quier esmucir coles cifres de la inversión inicial qu'esixe'l proyectu l'efectu contaminante d'una central que namás dexaría en positivo qu'impuestos y compensaciones al Ayuntamientu, ello al preciu añadíu de torgar el crecimientu urbanísticu de la ciudá y a cambéu d'una cifra de puestos de trabayu qu'en nengún casu diba pasar de les 40-50 persones.