Ochobre entamó con fuercia nes bolses

Setiembre acabó mal n'España. Les duldes de los inversores y los permalos datos macroeconómicos baxaron al Ibex-35 de los 7.000 puntos, ello amás del mal datu de producción industrial español, que cayó'l 1,7%. Sicasí, Wall Street y les principales bolses europees pesllaron en positivo celebrando les bones estadístiques de la primer potencia del mundu. La selmana foi de menos a más pa finar el vienres nun mini-rally alcista. Esti mes d´Ochobre va marcar la tendencia con que les bolses van trancar un añu 2003 que pue ser el primer exerciciu con beneficios dempués de tres años en perdes.



Los inversores festeyaron el bon datu de paru nos Estaos Xuníos y la creación de 57.000 puestos de trabayu non agrícola nos EEXX en setiembre. Si caltener se caltién la tendencia d´estos datos, acabaría la destrucción d´empléu en norteamérica. Esto ye importante yá que los analistes nun creen na recuperanza económica hasta que nun ven creación de puestos de trabayu. Wall Street entamó'l vienres un rally gracies a les estadístiques d´emplegu y trancó la selmana con una xuba de muncha fuercia. El casu ye que´l Dow Jones peslló con una xuba del 0,89 mentantu que´l Nasdaq xubió un 2,42%.



Perimportantes xubes nes bolses europees. La Bolsa de Francfort peslló'l vienres con una xuba penriba´l 3,5%. Nel Vieyu Continente tamién destacó la xuba de París que foi de más d´un 3% mentantu que Llondres y Madrid pesllaron con ganancies alrodiu´l 2%.

Si setiembre acabó mal, la Bolsa de Madrid entró ochobre con una xuba qu'arreciende a corrección técnica L´Ibex peslló en 6.922,30 puntos con una xuba del 2,36%. El Grupu Telefónica tiró p´arriba pel mercáu gracies a la xuba del 4% de la matriz. BBVA y SCH tamién tuvieron una bona selmana con xubes penriba´l 3%. Ensin dulda, foron los blue chips del parqué madrilanu los que ficieron posible un repunte en condiciones. Ente les ganancies destacó Arcelor con un 6,2% más. A la contra, NH Hoteles y Mapfre pesllaron en perdes. L´anuncia de la selmana pasada foi la investigación de la Comisión Nacional de Valores del polémicu cambéu d´acciones ente ACS y Dragados. Dempués de les quexes de dellos accionistes minoritarios pola falcatrúa, l'organismu supervisor va pidí-y a la consultora PriceWaterhouseCoopers que xustifique la operación .

La decisión de la Organización de Países Esportadores de Petróleu (OPEP) de menguar la producción espeyáronse yá esta selmana nuna xuba del preciu del oru prieto penriba´l 6%, y el prósimu recorte productivu nes refineríes va empicorotar entovía más el preciu del petróleu. De fechu, el vienres pasáu el preciu d´esta materia asitiose nos 28,5 dólares barril col riesgu d´una peligrosa xuba penriba los 30 dólares barril. Otramiente, l´oru tuvo una selmana tranquila col preciu aposentáu en 382 dólares la onza. Les bones estadístiques d´Estaos Xuníos afalaron una xuba del dólar, que ya val 1,16 unidaes per euru. Nel mercáu de renta fixo los bonos tuvieron una bona selmana con una pequeña xuba de rentabilidá.