Nun Tris fai un repás a los sos 15 primeros años de teatru asturianu

|

Nel 1995 debutó, como Teatru de Trebolén, una de les compañíes más actives del teatru asturianu: Producciones Nun Tris. Esti grupu ta acabante d’editar un llibru nel que recueye toles propuestes qu’entamó nos sos 15 primeros años de vida.

‘Quince años a la gueta les llendes del teatru asturianu’ ye’l nome de la obra conmemorativa que se presentó esta mañana nel Muséu del Pueblu d’Asturies. Los dos cabezaleros de la compañía, Inma Rodríguez y Antón Caamaño, encargáronse de conducir l’actu, nel que tamién participó Lluis Portal Hevia, collaborador de Nun Tris con dalgunes tornes. L’escritor, periodistas y investigador villaviciosín destacó que se cumplen “quince años de la fundación de Nun Tris; quince años vivíos cola intensidá d’un teatru profesional de calidá y afitáu nel trabayu de dos persones fundamentales del grupu como son Inma Rodríguez y Antón Caamaño”, pa depués emponderar el llabor “de los más d’ochenta actores y actrices” que pasaron pel grupu, “amás d’un númberu importante de collaboradores d’escena, cantantes, baillarines, malabaristes, animadores, interpretes, etc.”.

Portal recordó que nesi tiempu, del 1995 al 2011, Nun Tris representó más de cuarenta obres, de les que dalgo más de venti foron n’asturianu, hasta sumar les 400 funciones nesta llingua. “El grupu espacializóse de dalguna manera en teatru asturianu, un teatru, hai que decilo, de calidá; que casi naide fai, a lo menos de forma continuada o seria, non porque nun se faiga teatru en bable, que sí se fai y abondo, sinón pol cataxe costumbrista d’estes obres”. El de Villaviciosa apuntó que n’asturianu “escribióse muncho desque Antón de Marirreguera estableciera, nel sieglu XVII, posiblemente enantes, aquellos trazos primeros d’esi teatru; un teatru popular basáu n’obres mitolóxiques cultes, mui adecuaes pa satisface los gustos barrocos d’aquella época”. Darréu fixo referencia a la comedia del arte a l’asturiana “que se formó a lo llargo del sieglu XIX y XX al rodiu a grupos como la Compañía Asturiana, fundada nel 1915 y que sigue esistiendo milagrosamente, faciendo les comedies de siempre, con gran ésitu de públicu. El propiu teatru qu’arrebalga a la sociedá asturiana pa representase en Madrid y n’América –Carlos Ciaño, los hermanos Barredo, etc.– ye discutíu entós como ferramienta lliteraria válida. Sin embargu, autores bablistes de la calidá de Pepín de Pría manchen la so trayeutoria con estes obres que nun-yos aporten nin un migayu de fama, más bien lo contrario; rebaxen-yos la validez d’una obra importante”.

“Tamos nel sieglu XXI y, anque paeza mentira, n’Asturies sigue representándose, con bastante ésitu por cierto, les obres de Cadaveda, Constantino Cabal, Malgor, Eladio Verde, Napoleón Acebal, Emilio Palacios, Antón de la Braña, Eduardo Llupo, Emilio Robles, Manuel Antonio Arias, Xosé Peláez, etc. En total, son más de 400 títulos costumbristes a disposición del teatru que, pese a l’apolmonante presencia nos coliseos asturianos y la presencia d’un públicu fiel –anque actualmente se nota la falta de renovación–, reflexa un agotamientu d’esi discursu, un discursu falsu al mio entender, probetón, simplayu, que nun ufierta más que confusión a la escena asturiana”, señaló, pa depués afirmar que’l teatru asturianu “tien que ser plural necesariamente, ricu, vivu; qu’identifique convenientemente a la sociedá actual, o bien una güeyada retrospeutiva diferente, ‘vintage’ de la realidá”.

“Nun Tris topóse con esa disyuntiva. Facer teatru asturianu, ¿qué conlleva? Conlleva adaptase en primer llugar a un públicu serondu qu’espera sorprendese col bable ensin escaecer del too la comedia costumbrista, y a un públicu nuevu al que nun-y presta migaya, más bien resulta-y intelixible esi tipu d’obres. Pue facese ensin cayer necesariamente nesi folleru costumbrista, entamando los propios actores en creer no que faen”, esto ye, “en facer montaxes en llingua asturiana, siendo respetuosos con ella”, añadió. Pa finar la so intervención, y tres facer un repás a dalgunes de les obres de Nun Tris, Portal afirmó que “el papel de grupos como ésti ye fundamental pa los intereses de la cultura y del pueblu asturianu”.

Una estrena n’agostu

La segunda parte de la presentación consistió nun llargu percorríu pola trayeutoria de Nun Tris, ayudaos por imáxenes y videos. Asina, Rodríguez y Caamaño repasaron toles estayes que trabayó la compañía nestos años: etnodrama, mitoloxía, tradición oral, comedia del arte, monólogu, contemporaneu y otros estilos. Asina, detallaron y comentaron anéudotes d’obres como ‘Cigua’, ‘A la gueta l’ayalga’, ‘Brenga’, ‘El caballero de la murnia figura’, ‘Los amorinos de Bastián y Bastiana’ o ‘El pelegrín valiente’, y recordaron a actores que yá nun tán na compañía o persones que collaboraron con ella, como Berto Álvarez Peña o Adolfo Camilo, ente otres.

D’igual forma, anunciaron la estrena pal mes d’agostu nel Teatru Riera de la obra ‘Xuan el namoráu’, una farsa cubana de 1.900 “que caltién bastante actualidá” y na que participa Portal cola torna. L’actu finó con un performance de Caamaño y una pequeña espicha nel prau del Muséu del Pueblu d’Asturies.

 

Contador Estadistiques