"Nun escribimos poles sovenciones, pero podíen tar más orientaes al autor y menos a la imprenta"

El programa "Asina foi… el surdimientu" que dirixe pa la emisora lluanquina Onda Peñes Inaciu Galán en collaboración con Asturies.com asoleya esta selmana la entrevista a dos autores mozos, qu'asoleyaron a últimos del 2005 los sos primeros poemarios. Al traviés del testimoniu de Pablo Texón y Susana Sela podemos conocer la influyencia del Surdimientu sobre la so obra y los enfotos de futuru d'estos autores de la conocida como 'Tercera Xeneración del Surdimientu' nuna entrevista na que la lliteratura n'asturianu ye protagonista, tanto dende'l puntu de vista de la creación como de la repercusión que tien na sociedá pa la que ta fecha.