Nuevu númberu de "Entrambasauguas"

La revista "Entrambasauguas" qu'edita la Secretaría pal Navia-Eo de l'Academia de la Llingua asoleyó estos díes el so númberu 24. Lapublicación, única revista periódica que s'edita na fala del Navia-Eo, entama con un artículu sobre como se vivieron les elecciones del añu 1979 en Tapia al traviés del testimoniu de dos de los candidatos d'aquella primer votación democrática pa escoyer alcalde. Propuestes de recorríos pela "ruta das bodegas" ente Grandas y Pezós, les lliendes sobre Os Teixois recoyíes por Alberto Álvarez Peña, una reseña sobre'l grupu folk Darbukka o una entrevista col responsable de la revista on-line falaviva.net completen esti númberu de la revista, que pue alcontrase n'estremaos puntos de venta de los conceyos del Navia-Eo y tamién en llibreríes especializaes de Xixón, Uviéu y Avilés.