Nuevu llibru d'Esther García

La Fundación Municipal de Cultura de Castrillón ta acabante d'espublizar una obra nueva de l'autora María Esther García López. Baxo'l títulu "Castrillón: dellos llabores alredor de la quintana" la profesora de lliteratura recueye los llabores tradicionales nel campu y na ganadería del conceyu a lo llargo de 14 capítulos.

Anque natural del conceyu Valdés, Esther García, que lleva años poniendo clas nel IES "Isla de la Deva" de Castrillón, tien collaborao muncho na recuperación de la memoria de Castrillón, siendo ún de los sos trabayos más interesantes "Las Escuelas del Ave María de Arnao: Un estudio histórico" obra que salió nel añu 2004 dientro de la colección "Abogaderu" qu'edita tamién el Conceyu de Castrillón, colección a la que pertenez tamién esti nuevu volume sobre los llabores nel campu.

Mª Esther García López, miembru correspondiente de l'Academia de la Llingua Asturiana, ye autora de dellos llibros y publicaciones n'asturianu que traten de temes bien distintos, asina na so faceta de mayestra escribió "Didáutica y d' Investigación sobre Llingua y Cultura Asturianes: Llingua Asturiana y Práutica Simulativa na E.X.B" (1989) Esther García ye tamién coautora de los llibros de testu pa la enseñanza del asturianu pa Primaria "Cuélebre" (1995) y del llibru de testu pa 1º de ESO Rede I (2004) publicáu por VTP. D'otra manera, na so obra lliteraria destaca'l so llibru de poesía L.luribaga (2003) editáu pola Academia de la Llingua Asturiana y Antología poética de Valdés (2001), del que ye coautora.