Nuevu llibru de Xosé Antón González Riaño

L'académicu de la llingua Xosé Antón González Riaño y Xandru Armesto Fernández presenten el xueves, día 13, los resultaos d'una importante investigación sociollingüística, titulada "Les llingües n'Asturies: usu y valoración de la so importancia educativa"

L'académicu y profesor de la Universidá d'Uviéu Xosé Antón González Riaño y l'investigador Xandru Armestu Fernández presenten n'Uviéu'l llibru "Les llingües n'Asturies: usu y valoración de la so importancia educativa". L'actu va tener llugar nel Club de Prensa de La Nueva España'l próximu xueves, 13, a les 20 hores.

Nel volume recuéyese'l plantegamientu y los resultaos d'un estudiu de calter sociollingüísticu, fechu colos alumnos de Maxisteriu de la Universidá d'Uviéu, al rodiu de les sos actitúes hacia l'asturianu y el castellán, la conciencia d'usu d'ambes llingües y la importancia qu'atribúin, respeutivamente, a la presencia escolar tanto del asturianu como del castellán.

Según destaca l'Academia de la Llingua nel comunicáu en que da anuncia de la presentación de la obra "La relevancia de la investigación ye bultable darréu que la población de referencia ye l'alumnáu de Maxisteriu, ye dicir, los futuros profesores d'Educación Primaria nel nuesu sistema educativu y, lóxicamente, les sos opiniones, actitúes y conocencia llingüística va tender llueu, na so práutica educativa, una decisiva incidencia".

Esta investigación sociollingüística fai'l númberu 2 de la coleición Estaya Sociollingüística de l'ALLA, que dirixe'l profesor Llera Ramo. L'Academia de la Llingua empondera esti volume en cuantes que "complementa dafechu la panorámica sociollingüístico-educativa n'Asturies, de la que yá se teníen datos de calter xeneral, ufiertaos pol mesmu Llera Ramo nel so perconocíu II Estudio Sociolingüístico de Asturias, y con otros más parciales y rellacionaos coles actitúes del alumnáu nel llibru la investigación Lengua Familiar y Enseñanza de la Lengua Minoritaria" obra d'Huguet Canalis y el mesmu González Riaño.

Nel actu de presentación van intenvenir, amás de los autores, Ana Cano, presidenta de l'Academia de la Llingua Asturiana.