Nueve empreses con productos y servicios n’asturianu comparten espaciu na FIDMA

|
Puestu d'Iniciativa pol Asturianu na LXIV FIDMA

Iniciativa pol Asturianu ta presente un añu más na Feria Internacional de Muestres d’Asturies (FIDMA) con un puestu pa dar a conocer el coleutivu y visibilizar l’idioma ente los miles de visitantes que pasen tolos díes pel recintu. L’espaciu compártelu con nueve empreses con productos y servicios n’asturianu.

Les persones que s’averen al pabellón 3-4, puestu 9B, van poder conocer la ufierta comercial de Puru Remangu, Cuatro Gotes Producciones, Tiza y Peonza, Trabe, Cerveza Caleya, Cartonajes Vir, 9000 soluciones, Acuto Xuegos y Nordés Móvil. Son les firmes que se sumaron esti añu a la propuesta d’Iniciativa pol Asturianu pa dar visibilidá a la cada vez mayor iniciativa empresarial en llingua asturiana.

Amás de poder mercar un llibru, una cerveza, un xuegu o una camiseta n’asturianu, el visitante tamién va tener la oportunidá de conocer el funcionamientu d’Iniciativa pol Asturianu y asociase. Pel puestu pasaron nestos trés primeros díes políticos como’l secretariu xeneral de Foro y diputáu Adrián Pumares, l’eurodiputáu socialista Jonás Fernández Álvarez y l’alcalde de Mieres Aníbal José Vázquez; responsables de SNL, como María Xosé Rodríguez López (Xixón); o los miembros del Coro Minero de Turón, ente otros.

La sesentena cuarta edición de la FIDMA celébrase en Xixón hasta’l día 22. El so horariu ye de 11 a 22 hores.

Na semeya, visitantes observen una parte de los productos espuestos nel puestu d'Iniciativa pol Asturianu.

Contador Estadistiques