Nueche de poesía y música asturiana n'El Barucu

Soníos, idees y sones fechos n'Asturies ye l'apueste d'El Barucu pa la nueche d'esti xueves 30 de marzu. Ello ye que l'escritor Miguel Rojo va presentar el so últimu llibru cola compañía d'unos bonos amigos, los músicos Ígor Medio y Lisardo Prieto que presentaron apocayá'l so discu conxuntu, amás de Lorena García, de "La Bandina'l Tombo" y el percusionista Rumaldo Barbero.

L'escritor Miguel Rojo va presentar nel chigre xixonés el so poemariu nuevu "llaberintos" qu'edita la casa Trabe. Rojo nació en Zarracín, Tinéu, nel añu 1957, ye Doctor en Bioloxía y profesor d'institutu y ún de los escritores n'asturianu más activos dende l'entamu del surdimientu. Algamó'l Premiu Xosefa Xovellanos cola novela Asina somos nós, tres de la que vieno "Tienes una tristura nos güeyos que me fai mal" (1989) atractivu conxuntu de relatos qu'algamó gran popularidá nel so día y que namás superó la so siguiente obra, "Hestories d'un seductor (Memories d'un babayu)", novela caltriada d'ironía cola que ganó la primer edición del Premiu de Narraciones Trabe nel añu 1993. Amás de rellatos infantiles como " Telva y los osos", Rojo diose a conocer como poeta ganando nel añu 1996 el Premiu Fernán Coronas col so llibru "Buscador d'estrel.las", entamando una xera poética que siguió nel llibru "Bilbao: estación terminal" nel 2001 y agora con "llaberintos".

Xunta los poemes de Miguel Rojo, tamién va poder disfrutase de la música de trés de los meyores músicos folk d'Asturies, Ígor Medio, Lisardo Prieto y Lorena García. Los dos miembros de Felpeyu, que va poco presentaron el discu "Dual", xunta la clarinetista de "La Bandina'l Tombo" y el percusionista Rumaldo Barbero tienen preparada una actuación especial xunto al poeta y narrador de Tinéu avalada pola calidá de "Dual" discu nel qu'hai principalmente poemes d'escritores asturianos a los que se-yos punxo música, ente ellos Pin de Pría, Fernán Coronas o Xosé Miguel Suárez Tapia. L'actu va entamar a les 21:30 hores nel local "El Barucu", que ta na cai Almacenes de Xixón.