N’alcordanza del escritor de Sama: “Reivindicamos qu'hai una poesía íntima y social d’Antón el Chiova”

El sábadu celebróse en Sama un actu n’alcordanza d’Antón el Chiova con motivu del 145 aniversariu del so nacimientu. “Hai una poesía íntima y social d’esti autor”, reivindica Lluís Aique Iglesias, ún de los coordinadores de la cita, sobre un escritor con imaxe de poeta festivu.

El salón principal de la Sociedad La Montera acoyó esti homenaxe a Valentín Ochoa Rodríguez, qu'emplegaba l'alcuñu lliterariu d'Antón el Chiova, escritor nacíu nel yá desapaecíu barriu de Los Nozalones de la población llangreana. Una iniciativa d’Encuentros Tertulia y del Sindicato Autores Langreo que s’allargó per hora y media, 30 minutos más del horariu previstu nun primer momentu, que coordinaron Solinca Turbón y Beatriz Quintana Coro xunto con Iglesias, que s’encargó d’abrir l’actu cola presentación de los intervinientes y unos trazos de la vida del autor llangreanu.

Miguel Ángel Fernández, fundador y ex presidente del sindicatu que descubriere va poco datos nuevos sobre Antón el Chiova, encargóse d’afondar nos aspeutos vitales d’Ochoa y la so obra, pa depués Angelita Cueva, conceyala de Cultura, Turismu, Educación, Política Llingüística y Memoria Histórica, arrancara una llectura de poesíes del escritor con dellos participantes. Pa finar, Xulio Arbesú interpretó dos temes propios, ‘La lloca’ y ún cantar inéditu dedicáu al so padre fináu, maquinista de profesión, y a les carboneres.

“Foi un escritor, un salmerón, un poeta y un activista cultural y políticu de Sama”, apunta Iglesias a Asturies.com. “Nel primer terciu del sieglu XX foi un republicanu convenciu y mui demócrata, arrenunciando al carné del Partíu Republicanu cuando prohibió equí los actos relixosos porque él pensaba que la República venía pa que toos se pudieran espresar”, añade.

La vida nun resultó fácil p’Antón el Chiova “porque perdió a la fía, a la muyer, el fíu morrió na Guerra Civil y depués, nos años 40, foi xulgáu por masón”. “Yera una persona tan querida en Llangréu que xente de tolos colores, sobre too xente del réxime, claro, punxo la pallabra por él diciendo que yera bona persona, honesta, y al final foi perdonáu”, rellata’l tamién escritor.

Sicasí, “la sociedá equí yera mui opresiva y tenía muchos recuerdos negativos pa él, y acabó marchando pa Xixón, onde morrió, pa nun tener revivir los sitios y socesos del valle”.

Dos homenaxes previos

Foi nel 1951 cuando finó Ochoa, que recibiría’l so primer homenaxe nel 1974 por parte del Conceyu de Llangréu. “L’actor principal del mesmu foi León Delestal, que fixo una antoloxía entitulada ‘Versos’, pero tovía taba vivu Franco y había munches coses que nun se podíen dicir. Entós esi homenaxe foi más que nada sobre una parte de lo que yera Antón el Chiova como escritor, que yera la parte festiva, sorrayándose muncho que yera siguidor de Teodoro Cuesta, otru poeta que conocemos sobre too como poeta festivu. Entós la idea que queda d’Antón ye’l d’un poeta festivu qu’espublizaba nos porfolios de les fiestes y yá.”.

El segundu llegó nel 1994, cuando la Selmana de les Lletres Asturianes tuvieron dedicaes a él, “pero tolos esfuercios de recuperación de la figura siguieron esi camín que marcó León Delestal”. L’actu entamáu’l sábadu, poro, “ye una forma de reivindicar qu’hai una poesía íntima d’esti autor y hai una poesía social, inclusive política, y d’eso nun se sabe muncho”, reivindica Iglesias.

“Nun se conoz nin onde nació porque’l barriu de Los Nozalones, onde nació, destruyóse y nun esiste; en dalgún llugar enfrente de lo que güei ye la ilesia de Sama, que nun esistía porque en Sama nun había parroquia, yera la parroquia de Ciañu, onde se tuvo que bautizar. Hai munchos quiciás que fai qu’esto surdiere”, amplía sobre l’actu de recuerdu que previsiblemente tendrá continuidá “porque hai feches más grandes entovía, el 150 aniversariu, y porque queda muncho por saber d’él”.

Na semeya, Fernández recita un poema d'Antón el Chiova, con Arbesú, sentáu, cola guitarra.