Nacionalismos a debate n'Uviéu

Celébrense dende ayeri llunes na Facultá d'Historia de la Universidá d'Uviéu les V Xornaes d'Historia Contemporánea, organizaes pol Conceyu de Xóvenes Historiadores, y que se dediquen nesta edición al análisis y debate sobre los nacionalismos.

Dempués de la conferencia d'apertura d'ayeri, que corrió al cargu del profesor Francisco Erice y na que se faló de "Izquierdes y nacionalismu" el debate sigue güei martes dende les 12:30 h cola conferencia "Hacia la Europa de los pueblos" del profesor Xavier Zabaltza, mientres que dende les 19:30h Xacobe Bastida, profesor de Filosofía del derechu, Fernando Wulff, profesor d'Historia na Universidá de Málaga, van debatir sobre "España: ¿realidá o mitu?".

El mesmu Fernando Wulff abre la xornada del miércoles a les 12:30h cola conferencia "¿Es una nación una patata?" a les doce y media, mientres que dende les siete y media de la tarde, l'historiador Valentín Burgos va falar en "De los zares a los soviets: nacionalismu y islamismu n'antigua Unión Soviética" de les tensiones internes dientro de la monolítica URSS.

Pa la xornada del xueves 6 d'abril cuéntase cola participación del profesor d'estudios árabes na Universidá de Madrid cola conferencia "puxu y declive del nacionalismu árabe" dende les 12:30h. El profesor de Ciencia Política y collaborador de bien de medios de comunicación Carlos Taibo va pesllar el seminariu cola conferencia "La esplosión nacionalista na Europa del Este" a les 19:30h.