Nacho Vegas ta acabando'l so nuevu trabayu discográficu

El cantautor asturianu Nacho Vegas foi hasta la localidá gaditana de Puerto de Santa María p'acabar los sos nuevos discos. Ellí ta trabayando pa sacar un nuevu epé y un nuevu álbum xunta'l míticu productor del Xixón Sound, Paco Loco. Na grabación d'esti trabayu collabora tamién John Agnello, reconocíu productor y inxenieru de soníu que trabayó con grupos como "Dinosaur Jr", Patti Smith, Bob Dylan o "Redd Kross". Vegas esperá sacar l'epé, que va entitulase "El hombre que casi conoció a Michi Panero", títulu que tien una evidente referencia a la familia del poeta malditu d'Astorga, Leopoldo Panero, pa primeros de marzu. El media duración va ser un aperitivu de lo que venga dempués nel álbum de llarga duración qu'asoleye esti añu Vegas y que va entitulase "Desaparezca aquí" un trabayu que en Limbo Starr cuenten con sacalu pal mes d'abril, tamién a primeros.

Per otra partetamién ta preparándose la reedición del llibru de monólogos rellatos y poemes del propiu Nacho Vegas, que lleva por títulu "Política de hechos consumados".