Nacho Vegas, Manta Ray, La Bandina y Llan de Cubel encabecen los actos institucionales pal Día d'Asturies

Nava va ser el conceyu au se celebren esti añu los actos festivos oficiales del Día d'Asturies, que va tener protagonismu esclusivamente asturianu coles actuaciones de Manta Ray, La Bandina o llan de Cubel ente otros y cola celebración d'una feria del discu y el llibru n'asturianu a lo llargo de dos díes de folixa.

El director xeneral de Deportes, Daniel Gutiérrez Granda presentó ayeri'l programa de los actos oficiales del Día d'Asturies acompañáu pol alcalde del conceyu anfitrión, Claudio Escobio y pol presidente de la Mancomunidá de la Sidra Javier Parajón. Granda presentó como una de les principales novedaes d'esta edición del Día d'Asturies, que'l Gobiernu asturianu celebra cada añu nún conceyu distintu, les dos sesiones de fueos artificiales que van celebrase'l xueves 7 y el vienres 8, anque nel programa llama tamién l'atención el fechu de que toles actuaciones musicales programaes pa estos dos díes van ser esclusivamente asturianes.

Los actos programaos van entamar el xueves de tarde cola apertura del Mercau Astur y la la Feria de Productos Asturianos, nel que van participar 80 puestos de conserves, embutíos, quesos, artesanía, miel o mermelaes. Esa mesma tarde va abrise al públicu la Feria del Discu y del Llibru Asturianos, cola collaboración de Publicaciones Ámbitu,la Oficina de Política Llingüistica, Fonoastur, Discos Laguañaz, Madú Ediciones, Piraña Family, Mundo sonoro, l'Academia de la Llingua y Editora del Norte.

Dos esposiciones van celebrase en Nava con motivu del Día d'Asturies, la primera entitulada "Muyer y Deporte n'Asturies" va facer un resume de la historia de la presencia de la muyer na historia del deporte del país, mientres que la segunda recueye 350 instrumentos musicales procedentes los más d'ellos de les colecciones de Fernando de la Puente y José Angel Llaneza. Otra de les actividaes complementariesd va ser el vienres, cuando va celebrase una preba de sidra cola collaboración de siete llagares na que la venta de vasos va dase pal programa de prevención d'accidentes en carretera de la Cruz Roxa n'Asturies.

Les actuaciones musicales, lo mesmo na viéspora que'l Día d'Asturies van correr a cargu de grupos asturianos. El xueves 7, el cantautor asturianu Pablo Moro va tocar na
Plaza Domingaes dende les 8, mientres qu'el xixonés Nacho Vegas va facelo a les 10 na Plaza Manuel Uría, abriendo un conciertu que va pesllar l'actuación de la banda de post-rock Manta Ray dempués del espectáculu de fueos artificiales. Pal vienres 8,les actuaciones musicales repiten horariu y esquema pero colos nomes de Xulio Ramos y los grupos folk La Bandina y Llan de Cubel. Les actividaes del Día d'Asturies van complementase con desfiles de grupos folclóricos, actividaes y talleres pa la reciella y una proyección de curtios de cine asturianos que va facese nel Muséu de la Sidra.