MUS celebra La Vida col so últimu discu

Dende 2004 nun se sabía nada, discográficamente falando, del
dúu asturianu MUS, ún de los referentes más importantes de
la escena independiente asturiana y española. Nesti discu nuevu,
entituláu La Vida, el grupu amuesa un sutil xiru a un estilu más
lluminosu, un pop dalgo más amable o allegre, pero coherente en tou
momentu colo que yá se conoz d'esti grupu formáu por
Mónica Vacas y Fran Gayo.



Los siguidores del grupu namás poner el cd nos sos reproductores van
reconocer a la so banda, ya que nesti La Vida los elementos identirarios de
MUS
tán mui presentes, la voz susurrante y xixilante de Mónica Vacas
y la base musical delicada y cenciella son pegollos que sofiten el discurusu
musical de MUS. Pero nesti discu tópase dalguna diferencia, sobre tou
nel palnu musical, onde se nota que MUS tán n'otra etapa de la vidal,
con sonoridaes nueves usando instrumentos como l'autoarpa, la melódica
o'l melotrón, amás de la batería, guitarres y baxos que
son a la fin quien dan encontu a tolo demás. Pa les lletres d'esti
discu'l grupu xugó con testos tradicionales y llestres propies pa iguar
a la fin un repertoriu de temes sobre sentimientos y ambientes mui del gustu de
MUS.



La Vida sal al mercáu de la mano de la casa de discos
Green Ufos, la nueva
discográfica cola que trabaya MUS, tres d'acabar cola que yera la so
compañía de discos anterior Acuarela. El cd mezclóse nel
Estudio de Grabacion de Paco Loco en Puerto
de Santa Maria (Cádiz), y contó cola collaboración de
músicos como Pedro Vigil (Vigil, Edwin Moses), qu'arriendes de poner en
bien de temes la so guitarra, coproduxo'l discu xunta Fran Gayo, el 50 % de MUS
xunta Mónica Vacas. El percusionista Manuel Molina, Xabel Vegas y Josele
García de Manta Ray, Luigi Navarro o Sara Muñiz y Pablo Errea
d'Edwin Moses son otros de los collaboradores d'esti La Vida, que se
grabó ente los meses de febreru y payares de 2006.



MUS espubliza esti cd depués de collechar les meyores crítiques
de la prensa especializada colos sos discos anteriores. Fai, El Naval o Divina
Lluz tuvieron el preste del públicu asturianu y español, pero lo
que más rescampla ye que MUS cola so música convirtióse
nun grupu consideráu na escena internacional, llevándolos a tocar
en sitios como EE.UU, Francia, Rusia o Taiwán , faciendo que
paradóxicamente la banda namás tocara en trés ocasiones
n'España, dos n'Asturies y una en Barcelona. Una d'eses escases
ocasiones de ver a MUS en directo va habela'l próximu mes de xunu, ya
que Fran y Mónica, xunta la so banda, van actuar en Barcelona el 1 de
xunu y el 14 del mesmu mes nel Centru Cultural de Caxastur d'Uviéu.