Movimientos contra la llinia d'alta tensión Soto-Penagos

La formación política Izquierda Asturiana (IAS) y el Conceyu contra la llinia Soto-Penagos presentaron esta selmana denuncies de distintu tipu contra la construcción del trazáu d'alta tensión que va atravesar l'oriente asturianu. Per una parte, IAS punxo en rexistru de Delegación del Gobiernu un testu d'alegaciones contra la variante de trazáu de la llinia, que diz que negociaron l'alcalde de Piloña, Juan Roberto Pérez y Rede Eléctrica Española cola collaboración d'antiguos afectaos pol trazáu orixinal qu'agora vense llibres del pasu de les torretes y los cables peles sos finques. IAS denuncia que'l conveniu "fízose de manera escurantista, ensin pasar per plenu nin comisiones y, lo que ye más grave, ensin la conocencia de los nuevos afectaos".

Tocante al Estudiu d'Impactu del nuevu trazáu IAS sorraya nes sos alegaciones qu'hai aspectos que tan poco estudiaos y evaluaos, ente ellos l'impactu que la llinia pue producir sobre la salú. IAS acusa al alcalde piloñetu de mentir nes distancies a les viviendes de los cables y de cizañar ente los vecinos por meyorar a unos y perxudicar a otros.

IAS, más allá del dañu a particulares y a la salú causaos pola alta tensión, tien una postura d'oposición dafechu a la lliniay asegura qu'esta ye perxudicial pa la economía, el turismu, el paisaxe, el patrimoniu y que sobremanera, nun aporta nengún beneficiu". La formación d'izquierdes tien puesta una denuncia na UE contra'l trazáu que ta en fase d'investigación y prepara acciones legales a nivel estatal.

Xunto cola denuncia d'IAS, la plataforma Conceyu Contra la Llinia Soto-Penagos presentó en conceyu Piloña denuncia poles obres, que tán entamando operarios de subcontrates de Rede Eléctrica en faces particulares de Lludeña y Pintueles, peles que yá pasen otrs dos linies de 200kv, pa tomar midíes y asitiando finxos pa marcar el nuevu trazáu de la llinia Soto-Penagos. La plataforma afirma qu'esto nun pue facese ensin resolver primero l'estudiu d'impactu ambiental de la variante d'alta tensión.