Morrió l'ex - presidente rusu Boris Yeltsin

L'ex-presidente rusu, Borís Yeltsin, morrió ayeri a los 76 años. El kremlin confirmó la noticia pela tarde, y un portavoz del gobiernu rusu aclarió que'l fallecimientu debióse a problemes cardiacos. Presidente de Rusia ente los años 1991 y 1999, Yeltsin forzó la dimisión de Gorbachov, últimu presidente de la URSS. Nel so mandatu disolvióse l'antigua Unión Soviética dando pasu a l'actual federación d'estaos.

Dos años dempués de llograr el sofitu del pueblu nes urnes, Boris Yeltsin emporcó la so imaxe de demócrata cuando mandó a los tanques disparar contra'l parlamentu, ocupáu polos sos opositores políticos nuna operación na que morrieron 150 persones. Nel añu 1994 Yeltsin entamó la primer ofensiva militar contra Chechenia, na qu'hebo miles de muertos y que s'espurió hasta 1996, retomándola'l so sucesor nel cargu, Vladimir Putin.

Vueltu a escoyer presidente nel 1996 col sofitu de los nacionalistes, viose bien ceo que Yeltsin entamaba a gastar poca salú. El 31 d'avientu del 1999, en medio d'una grave crisis económica, Yeltsin anunció por sorpresa que dexaba'l cargu en manes del que fuera xefe de los servicios secretos, Vladimir Putin, que-y concedió la inmunidá por tolos sos posibles delitos de corrupción.