Miles de persones pidieron la oficialidá del asturianu n'Uviéu

La organización del Conceyu Abiertu pola Oficialidá (CAO) declarose mui contenta col resultáu de la xornada reivindicativa a favor del asturianu entamada esti sábadu. Les seis marches a pie entamaes dende distintes ciudaes asturianes y la manifestación celebrada ayeri peles cais d'Uviéu nun merecieron otro que calificativos positivos dende la plataforma cívica a favor del asturianu. La organización peritó l'asistencia a la marcha d'Uviéu nunes 20.000 persones, una cifra que fontes policiales rebaxaron a 4.000. En cualquier casu, l'agua que cayó a lo llargo de tol día, y, especialmente, nel trescursu de la manifestación, fexo rescamplar la fuerza de voluntá de los manifestantes a favor de la llingua énte esti procesu de reforma del estatutu d'autonomía qu'acaba d'entamar, una imaxe que foi especialmente clara na estampa de los participantes nes marches a pie dende Xixón, Avilés, Siero, Llangréu, Trubia y Mieres, que, dempués d'una mañana d'esfuerzu, cortaron el tráficu na cai Xeneral Elorza pa llegar hasta la manifestación.

La presidenta de l'Academia de la Llingua, Ana Cano; el periodista y realizador Ramon Lluis Bande; l'actor y guionista Maxi Rodríguez; el cantante de Nuberu Chus Pedro o'l gaiteru Jose Ángel Hevia figuraben, ente otros, ente los portadores de la pancarta d'apertura de la marcha: "Asturies pola Oficialidá" yera una vez más el lema de la convocatoria, una frase directa y cenciella tres de la que veníen otres munches pancartes espeyando siempre variaciones sobre esa mesma reivindicación cola firma de les organizaciones y colectivos que defenden la oficialidá y que vinieron dende tolos puntos del país, incluso dende'lo so estremu más occidental, cola presencia de Xeira reivindicando'l reconocimientu pal gallego-asturiano, una demanda que tamién espeyaron otros colectivos y que tuvo igualmente presente nel manifiestu final de la convocatoria, que lleeron el gaiteru José Ángel Hevia y la escritora Berta Piñán na plaza Porlier, onde acabó la manifestación.

Nel discursu final, el gaiteru José Ángel Hevia fizo un llamáu a los responsables políticos pa que l'asturianu pueda usase normalmente, dalgo que pasa pel reconocimientu xurídicu de la so oficialidá. Nes propies palabres del discursu "ye imprescindible que los partíos políticos mayoritarios n'Asturies asuman el diagnósticu sociollingüísticu que faen los sos compañeros n'otres comunidaes: ye imposible recuperar una llingua minorizada namás coles polítiques de promoción superficial que se vinieron faciendo hasta agora". L'alvertencia del CAO foi clara"lEstatutu tien que reconocer la oficialidá porque si non van tener que repetilu". Ver galería de semeyes