Miguel Solís Santos, premiu de periodismu n'asturianu 2007

L'escritor avilesín Miguel Solís Santos ye'l ganador de la IV Edición del Premiu de Periodismu en llingua asturiana 'Enriqueta González Rubín', que convoca la Conseyería de Cultura y Turismu del Principáu.
Solís Santos algamó esti galardón, dotáu con 3.000 euros, pol artículu 'La hemocianina de les andariques y el sangre del ciudadanu Capeto', publicáu nel diariu La Nueva España'l 15 de payares del 2005, según informó l'Alministración organizadora.

El xuráu que dio a conocer güei esti fallu taba presidíu por Consuelo Vega Díaz, directora xeneral de Promoción Cultural y Política Llingüística, y integráu, como vocales, polos escritores David Rivas, Lluis Xabel Álvarez Fernández y Roberto González Quevedo y, como secretaria, por Antonia Pedregal Montes, xefa de la Oficina de Política Llingüística de la Conseyería de Cultura y Turismu. Al premiu presentáronse un total de 14 trabayos publicaos en distintos periódicos y revistes. Tres la deliberación, resultó ganador por unanimidá l'artículu de Miguel Solís.

Nacíu n'Avilés en 1956, Miguel Solís cuenta con una llarga trayectoria como escritor en llingua asturiana.

De la so obra puen destacase 'Les Llamuergues Doraes' (primera novela escrita n'asturianu), 'El Trunfu Prietu' (premiada na cuarta edición del premiu Xosefa Xovellanos de novela), 'Los Falapios del Xigante' (novela cola que ganó'l Xosefa Xovellanos) y l'ensayu históricu 'La Memoria de les dos Orielles' (aproximación al estudiu de les xeneraciones astur-cubanes), que recibió l'accésit del premiu d'Ensayu Máximo Fuertes Acevedo. Collaborador en dellos periódicos, tamién destaca la so faceta de pintor, ilustrador y cartelista.