Miguel Allende y Héctor Pérez repártense'l Teodoro Cuesta

Miguel Allende (Llaviana, 1960) pol poemariu "Güelgues de gallón" y Héctor Pérez (Arllós, Llanera, 1978) pola obra "Como crecieres tu" foron los ganadores de la edición d'anguaño del premiu de poesía "Teodoro Cuesta" prestixosu certame lliterariu qu'entama'l Conceyu de Mieres y que da 4.000 euros de premiu que van repartise ente los dos escritores.

Pela parte del poeta llavianetu, Allende ye filólogu y trabaya como educador na Fundación Docente de Mineros Asturianos (antiguu Orfanatu Mineru). Relativamentedesconocíu pal públicu, l'artista asoleyare nel añu 2004 "Pallabres de payaso" estoyu de versos escritos a lo llargo de les últimes décades.

Con ser más mozu, Héctor Pérez Iglesias presenta un currículum más grande. Asina, ganó'l premiu Asturies Moza de poesía en castellanu del añu 2003 con "Las tardes baldías" añu en que se dio a conocer como poeta n'asturianu con "Prisión de náugrafu" (Trabe). Como narrador cunta con dellos premios de cuentos en castellanu y asturianu, rescamplando ente ellos l'Art Nalón qu'entrega'l conceyu de Llangréu.