Migoya y Madera prometen avances na toponimia

Nuna entrevista emitida ayeri pela canal local de TV "Canal 10" el Director de Política Llingüística Carlos Madera adelantó que se cuenta con que nun plazu curtiu puean aprobase espedientes toponímicos nuevos en Conseyu de Gobiernu. Les declaraciones de Carlos Madera amiéstense asina a les d'Ana Rosa Migoya, la Conseyera de Cultura, qu'adelantó nel actu inaugural de la Selmana de les Lletres el pasáu martes que tres de l'aprobación de los diez primeros espedientes toponímicos de conceyos nel añu 2005 hai otros siete que tan yá pa pasar el trámite definitivu "en feches mui próximes". Migoya fizo referencia tamién a otres iniciatives rellacionaes cola toponimia como les campañes informatives sobre toponimia y l'apaición d'un anuariu recoyendo l'actividá de la Xunta de Toponimia .

Remataría asina'l parón alministrativu que sufre'l procesu d'oficialización de los nomes de llugar tradicionales n'Asturies, un parón que s'espeya nel fechu de que se lleven yá más de 5 meses dende l'aprobación de los últimos espedientes y na montonera d'ellos que van apinándose a la puerta del Conseyu de Gobiernu. Ello ye qu'amás de los 7 que namás dependen yá del preste oficial, hai otros 29 conceyos nos que la Xunta de Toponimia ta trabayando, col llabor yá bien adelantáu en dellos.