Migoya defende en Senáu la vuelta de los Archivos de Salamanca a Cataluña

La conseyera de Cultura, Comunicación Social y Turismu, Ana Rosa Migoya, compareció ayeri nel Senáu xunta la ministra de Cultura y el restu de conseyeros de Cultura del Estáu a petición del Partíu Popular y de la Junta de Castilla y Lleón que solicitaben la creación d'un alcuerdu coles autonomíes sobre archivos y museos de titularidá estatal qu'atechen bienes y documentos "de patrimoniu común".

Na so intervención, na que nun entró a valorar nin fizo mención la conveniencia de devolver a Asturies los documentos que la nuestra comunidá tien nel archivu de Salamanca tres d'incautase d'ellos la tropa nacional en 1937, la titular de cultura defendió por embargu la decisión de devolvé-ylos a Cataluña, asegurando que "polemizar sobre la devolución de los fondos documentales de la Generalitat de Cataluña que s'alcuentren en Salamanca nun ye más qu'un intento del Partíu Popular d'instrumentalizar políticamente esta cuestión de la que creen que pueden sacar rentabilidá electoral".

Ana Rosa Migoya esplicó que nun creía qu'esistiere un debate sobre'l repartu de competencies en materia archivística ente l'Estáu y les comunidaes "más allá del que se quiera utilizar demagóxica y partidariamente". Contra ello, Migoya faló de crear "un verdaderu archivu de la Guerra Civil" en cuantes que "en Salamanca namás se guarda una parte de la documentación relativo a la guerra y especialmente sobre la represión de les actividaes republicanes, la masonería y el comunismu". Por ello Migoya ve preciso facer un archivu que sía "una institución de referencia nacional y internacional y que de verdá sía l'archivu de la Guerra Civil española y non de la memoria d'unos pocos, de los vencíos".

La intervención de Migoya en senáu mereció la condena d'Izquierda Asturiana. El partíu nacionalista emitió un comunicáu en que'lso portavoz nacional, Inaciu Llope, diz que la intervención de la conseyera ayeri foi "una monumental burlla a Asturies, al traviés de la cuál, la responsable máxima de cultura n'Asturies defende que se-y devuelva a una comunidá autónoma una documentación que la mesma conseyera renuncia a pidir p'Asturies nun casu homologable dafechu". Llope diz que "nun se pue aplicar permanentemente la llei del embudu y esisten razones de tou tipu,, históriques y práctiques pa esixir que los orixinales vuelvan a Asturies, independientemente de que se puedan consultar copies n'otros llugares". Respective a la esistencia de copies microfilmaes n'Asturies de los archivos, l'argumentu más recurríu dende la Conseyería de Cultura pa nun pidir la devolución de les 742 caxes d'archivos qu'IAS diz que tien Asturies en Salamanca, la organización nacionalista d'izquierdes diz que "la copia que tenemos n'Asturies ye parcial en cuantes que nella namás ta una parte del Archivu". D'otra manera, IAS diz qu'esa copia parcial pagóse con fondos del gobiernu asturianu, mientres que la copia que se va facer de los archivos catalanes, y del restu de los que s'acaben devolviendo, va pagase con perres del estáu. Por too ello, Izquierda Asturiana conclúi que los asturianos, a la lluz de la intervención de Migoya "somos ciudadanos de segunda cola complicidá y l'aplausu del nuestru gobiernu".