Microsoft premia a los informáticos asturianos

Los únicos proyectos españoles que recibieron anguaño'l premiu de la Microsoft Research, la estaya d'investigación de la multinacional de Bill Gates, dientro del proyectu de desarrollu "Rotor", son asturianos, y tan rellacionaos con temes de seguranza, una de les grandes obsesiones de la empresa americana, y con meyores nos llinguaxes de programación. El primeru d'estos proyectos, que vien yá del añu 2003, ta dirixíu por Mª Ángeles Díaz Fondón, profesora titular del departamentu d'informática de la Universidá d'Uviéu que fexo un estudiu sobre técniques de seguranza y control d'accesu pa sistemes operativos. El so llabor contribuye a facer los sistemes operativos más resistentes al ataque de los virus.

Pela so parte, el profesor Darío Álvarez coordinó a un equipu especialista nel desarrollu d'aplicaciones de programación orientada a oxetos, desarrollando'l prototipu base de Díaz Fondón y pasándolu de la teoría a la práctica, iguando sistemes de preba que permitieren trabayar con aplicaciones reales. L'últimu proyectu reconocíu por Microsoft ye'l que premia a los alumnos de Francisco Ortín Soler, especialista en programación adaptativo y que coordinó un equipu qu'apurrió modelos de computación flexible pa los sistemes nuevos que desarrolle Microsoft dientro de la plataforma "Rotor".
Más información na web de Microsoft Research