MIAS califica d’insultu les últimes declaraciones d’Areces sobre la emigración de la mocedá

Mocedá d'Izquierda Asturiana (MIAS) emitió güei un comunicáu en que valora les últimes declaraciones del Presidente asturianu Vicente Álvarez Areces, qu'afirmó que "la mocedá d'Asturies emigra porque la so cualificación ye meyor a les d'otres comunidaes autónomes".

Pal portavoz nacional de Mocedá d'Izquierda Asturiana, Carlos Suari Rodrigue, "esti fechu constitúi, una vegada más, un insultu per parte del presidente asturianu, que tornó a desmentir l'éxodu de miles de moces y mozos asturianes y asturianos cada añu a la gueta d'un trabayu dignu." Pa Suari "el gobiernu de la esquierda plural non solo nun foi quién a desendolcar midíes afayadices pa evitar la emigración forciada de la mocedá sinon que tracamundia datos pa xustificase y engañar a la sociedá asturiana" fechu que'l portavoz de MIAS topa "gravísimu" anque afita que "nun son a engañar a naide, porque toes y toos conocemos bayura de casos de mocedá titulao que nun ye a topar un emplegu acordies cola so capacitación nesti País". El representante de MIAS demandó "una política seria d'emplegu onde s'igüe la problemática de la emigración de la mocedá asturiano, ún de tantos fechos sangrinos que tamos padeciendo con estos malgobernantes", polo que desixó "menos insultos y mentires y más fechos y propuestes series".