Mesa de Unidad de los Verdes niega los argumentos que-y dio Joaquín Arce a Asturies.com

El grupu "Mesa de Unidad de Los Verdes" qu'ayeri fizo un manifiestu públicu ufiertándo-y a la organización nacionalista asturiana Andecha Astur el facer una llista electoral conxunta, retrucó al traviés d'un comunicáu de prensa les declaraciones a Asturies.com de Joaquín Arce, representante de Los Verdes d'Asturies, nes que-y quitaba pesu a la representatividá de "Mesa de unidad de los Verdes" nel conxuntu del movimientu políticu ecoloxista asturianu y estatal. Joaquín Arce, pela so parte, afitóse énte Asturies.com en toles sos afirmaciones y repitió que la única organización política ecoloxista con presencia histórica n'Asturies ye la qu'elli representa y non la Mesa que dirixe Esteban Cabal.

El comunicáu de Mesa de unidad de los Verdes sorraya'l reiteramientu de la so ufierta a Andecha Astur y matiza, en cualquier casu, qu'espera a qu'AA se pronuncie sobre la mesma pa entamar unes negociaciones. Otramanera, el comunicáu de La Mesa, que nun aclaria'l so estatus llegal al definise más que como un partíu "como una coordinadora qu'axunta a más de 70 grupos, colectivos y partíos verdes de toa España" afirma que Mesa de unidad de los Verdes "tien implantación en toles provincies y comunidaes autónomes d'España" plantegándose l'oxetivu de "presentar 500 candidatures ecoloxistes nes elecciones del 2007" dende la so posición de "referente principal del movimientu políticu verde n'España".

La Mesa echa en términos durísimos contra les declaraciones que fizo a Asturies.com Joaquín Arce, representante de Los Verdes d'Asturies que denunció la falta de representatividá de la Mesa de Unidad de Los Verdes, de la que declaró que nun-y conocía presencia nin militancia n'Asturies. Esteban Cabal, representante de la Mesa a nivel español, apuntó nesti sentíu que la so familia "ye de Sama de Llangréu" y que la Mesa "cuenta con afiliaos por toa Asturies".

Esteban Cabal acusa amás a Joaquín Arce de nun pertenecer a Los Verdes d'Asturies, asitiando'l so orixe políticu na formación "Izquierda Verde d'Asturies" que s'esgayare nel so día de "Nueva Izquierda". El dirixente de la Mesa afirma que'l grupu de Joaquín Arce "ta manteníu y al serviciu d'Iniciativa per Cataluña" y que los dos diputaos verdes n'Europa y el Congresu Español de la Confederación Verde na que tan inxertos Los Verdes d'Asturies consiguiéronse nes llistes del PSOE y non poles de Los Verdes. El grupu d' Esteban Cabal afirma igualmente que la "Confederación Verde" namás tien "presencia real" n'Andalucía y asegura qu'una sentencia del Supremu del 1999 reconoz el "derechu preferente" del so grupu a emplegar los símbolos y el nome de Los Verdes.

La Mesa alude tamién a una negociación que va tener llugar el próximu día 21 y na que, según afirma, el grupu d'Arce taría p'aprobar una propuesta de la Mesa de Unidad pa evitar duplicidá de llistes "polo que les manifestaciones d'Arce nun cuenten col respaldu de la so propia organización".

Joaquín Arce niega toles afirmaciones de la Mesa

En conociendo'l comunicáu de la Mesa de Unidad de los Verdes, Asturies.com faló con Joaquín Arce, representante de Los Verdes d'Asturies que negó toles afirmaciones del grupu d'Esteban Cabal.

Arce mostróse especialmente críticu cola defensa de la so presencia n'Asturies que fai la Mesa, reafirmándose na so primer declaración de que nun conoz implantación, afiliaos, acciones públiques nin presencia nenguna de la Mesa n'Asturies más allá de los dos teóricos candidatos a les alcaldíes d'Uviéu y Avilés qu'apaecen na so web. Arce afirma la historicidá de Los Verdes d'Asturies, fundaos yá nos años 80 del pasáu sieglu por Eduardo Campomanes y niega, como afirma Cabal, que provenga d'Izquierda Verde. Arce comentó nesti sentíu qu'Izquierda verde, cola qu'elli nun tenía rellación previa, fusionóse con Los verdes a principos d'esta década, denominándose'l partíu durante un periodu de transición "Los verdes-izquierda verde" .

Arce rafirmó que, efectivamente, los diputaos de Los Verdes consiguiéronse al traviés d'un alcuerdu puntual col PSOE, pero afitóse na pertenencia d'estos diputaos al so partíu, que negó que namás tuviere presencia n'Andalucía. Tampoco-y dio créitu Arce a l'afirmación de La Mesa sobre la so obediencia política a Iniciativa per Catalunya, sorrayando Arce que, anque IC-Verts sía una fuerza de gran pesu políticu en Cataluña, nun condiciona políticamente nin de neguna otra manera a los demás socios de la confederación. Arce defendió la propiedá del logotipu del xirasol "que ye'l nuestru, mientres qu'ellos tendrán derechu al emplegu del suyu, que s'asemeya al nuestru en tolo posible". No tocante a hipotétiques negociaciones pa evitar duplicidá de llistes Arce afirmó que la so organización lleva "años intentando qu'esta xente nun faiga duplicidá de llistes y encamentándo-yos que s'integren" polo que nun cree qu'agora vaya ser al revés.

Asturies.com faló igualmente con Ignacio González, responsable tamién de la directiva de Los Verdes d'Asturies, que confirmó puntu por puntu toles afirmaciones d'Arce y que desmintió tolo manifestao por Mesa de Unidad de Los Verdes y pol so responsable Esteban Cabal. González afirmó que nun se podía "tomar en serio a Cabal como representante del movimientu políticu ecoloxista español nin muncho menos del asturianu" en cuantes vive y desarrolla tola so actividá en Madrid, y criticó mui ácidamente la so estratexa política, afirmando que Cabal ta dedicándose "a rellenar llistes per toa España ensin planteamientos políticos y programáticos de fondu". El responsable de Los Verdes d'Asturies, única formación verde que lleva presentándose a les elecciones autonómiques asturianes dende 1989, afirmó que "nun queremos da-y propaganda a esti personaxe, porque ye lo qu'elli ta buscando, pero vamos esplicar y aclariar a quien tengamos que facelo quien ye en realidá esti señor" en referencia a la mesma Andecha Astur. González enfotóse en que la presencia del grupu de Cabal nun distorsione'l panorama electoral y reafirmó la voluntá de Los Verdes d'Asturies de volver a presentase nes autonómiques del 2007.