Mengua’l paru y aumenta la contratación en marzu

Asturies rexistró un descensu nel total de demandantes d’emplegu en 152 persones en marzu pa poner el total en 66.037 persones, la cifra más baxa pa esti mes dende l’añu 2008. Creáronse 1.152 emplegos nuevos nun periodu marcáu pola fuelga del tresporte y les consecuencies económiques de la invasión d’Ucraína.

Segundu mes de baxada del paru n’Asturies, entrambos en cantidaes pequeñes. Si en febreru’l Ministeriu de Trabayu y Economía Social comunicaba 100, en marzu’l descensu quedó en 152.

Supón una baxada del 0,23 por cientu, mentes que nel Estáu foi del 0,09 por cientu, 2.921 menos, que dexen el total en 3.108.763. Illes Balears, con un 5,74 por cientu, lidera esta cayida del paru, siguida de Cantabria (1,94 por cientu) y Canarias (1,65), mentes que los mayores aumentos diéronse en Melilla (2,42), La Rioja (2,31) y Navarra (2,09).

A nivel interañal, el paru menguó n’Asturies en 18.680 persones, lo que supón el segundu mayor descensu de tola serie histórica, un 22,05 por cientu, cuando la media estatal quedó nun 21,29 por cientu. Baxó en toles autonomíes, siendo les que presenten los meyores datos Illes Balears (40,36), Canarias (28,11) y Aragón (27,46).

Por sectores, rescampla’l retrocesu interañal del desemplegu na industria (23,40 por cientu) y la construcción (22,20). El de servicios, mentes, lideró’l descensu en marzu, con un aumentu pequeñu na industria y na construcción.

Reforma llaboral

La contratación caltién la tendencia bona de los meses últimos, en particular la de calter indefinida, “ún de los oxetivos fundamentales de la reforma llaboral, que se ta cumpliendo”, apuntó Pilar Varela, direutora xerente del Serviciu Públicu d’Emplegu del Principáu d’Asturies (SEPEPA). Asina firmáronse en marzu 23.817 contratos, 2.681 más que’l mes anterior, lo que supón un aumentu del 12,68 por cientu, de los que 6.238 foron indefiníos (26,19 por cientu), lo qu’implica un incrementu del 58,04 por cientu.

L’afiliación a la Seguridá Social asítiase mentes en 368.780 persones nel país por mor del aumentu de la contratación, con 1.152 emplegos nuevos magar el contestu vivíu en marzu, cola fuelga de tresporte y el conflictu bélicu n’Ucraína provocáu pola invasión rusa.