Mediu Ambiente tramita un proyectu pa facer una térmica en Trubia

La empresa Gas y Energía del Nalón quier entamar una central térmica a ciclu combináu en Caces - Trubia (conceyu d'Uviéu). Coordinadora Ecoloxista y IX d'Uviéu prendieron la voz d'alarma.

El proyectu ta agora en fase de consultes previes a la evaluación d'impactu mediuambiental, plazu en que puen facése-y suxerencies al Ministeriu de Mediu Ambiente, y consiste na instalación d'un grupu de ciclu combináu de 400 MW en Caces, inciativa que promueve Gas y Enerxía del Nalón S.A. De salir alantre'l proyectu, sedría la segunda térmica nueva que se propón n'Asturies nun asitiamientu distintu al de los grupos eléctricos que dende los años 70 igüen el parque termoeléctricu asturianu. Esti parque faenlu los grupos d'Aboño, La Ribera, Lada y Cangas, los cuatro afectaos tamién por proyectos d'ampliación y sostitución de grupos vieyos de carbón por otros a ciclu combináu. Xunta estos grupos yá esistentes, la propuesta del Grupu Isastur pa construyir un grupu térmicu en Valliniello-Avilés y la que ta agora acabante de presentase pa esti grupu nuevu en Trubia suponen un espardimientu espacial grande del parque termoeléctricu nel área central d'Asturies.

Contra esti proyectu presentó esta selmana alegaciones énte'l Ministeriu de Mediu Ambiente la Coordinadora Ecoloxista Asturiana, que pide que enantes de siguir cola tramitación del proyectu, y más nun contestu como l'actual en que diz que se tan presentando bien de proyectos de centrales "poco creibles" se tenga en cuenta que na redolada d'esta central que se propón yá tan industries altamente contaminantes, ente elles les bateríes de cok d'Industrias Doy) y la planta de Química del Nalón, ello nun conceyu que tien 200.000 habitantes. El dañu sobre'l Ríu Nalón, del que la térmica fadría un consumu d'agua d'hasta 460 llitros per segunduy al que vertería agua caliente son dellos de los impactos más graves qu'albidren los ecoloxistes nun proyectu que precisaría tamién de l'apertura d'un gasoductu nuevu y de llinies eléctriques d'alta tensión pa evacuar la corriente que se produxere.

D'otra manera, y en rellación a esti asuntu, el grupu d'Izquierda Xunida nel Conceyu d'Uviéu pidió-y al Alcalde que dea a conocer a los grupos de la oposición la documentación que remitiere'l Ministeriu de Mediu Ambiente sobre esti proyectu de central.