Más de 13.000 euros recaudaos na puya d’obres d’arte pola oficialidá

L'alcalde d'Uviéu, Gabino de Lorenzo, alquirió por 1.600 euros la obra de Pablo Maojo, "Fender el rayu". La puya del alcalde uvieín, que fexo nel so nome'l so representante José Arias Cachero "Felechosa" foi una de les más altes de la puya d'obres d'arte pola oficialidá celebrada esti miércoles n'Uviéu y na que se recaudaron más de 13.000 euros. Destacaes personalidaes de la política y la cultura asturianes como'l conseyeru Javier Valledor o la Presidenta de l'Academia de la Llingua Ana Cano participaron na puya.

L'artista Ánxel Nava, responsable de la organización de la esposición entamada pol Conceyu Abiertu pola Oficialidá destacó l'interés que llevantó la puya ente tolos sectores y que llograre'l propósitu de "recaudar y concienciar al empar, xuntando arte con reivindicación llingüística".

Otra de les obres que tuvo una cotización más alta foi una de l'artista María Jesús Rodríguez, que llevó un particular por 1.210 euros y pola que la Conseyería de Xusticia, que llevaba por escrito'l tope de puya que podía facer por cada obra, llegó a ufiertar 1.200 euros. Lo mesmo-y pasó a Valledor nel casu d'una obra de Bernardo Sanjurjo pola que namás podía ufiertar 800 euros y que quedó en manes d'Ana Cano, que fexo una ufierta superior.

El balance final de la puya foi de 36 obres vendíes y 13.200 euros recaudaos, de los que cerca de 10.000 van dir directamente a la financiación de les actividaes del Conceyu Abiertu pola Oficialidá, mientres que'l restu van dir a la cubrir los gastos de la esposición y la parte que-yos correspuende a los artistes que collaboraron cola iniciativa. En viendo l'éxitu de les trés esposiciones pola oficialidá que lleva feches el CAO, la organización nun descarta facer iniciatives asemeyaes, anque posiblemente se dexe pasar el periodu d'elecciones enantes d'una nueva edición.