Más cine sobre Asturies nel Festival de Xixón

"A golpe de tacón" curtiu que llogró apocayá gran reconocimientu nel so pase nel Festival de cine de Valladolid, va pasase esti xueves nel Festival Internacional de Cine de Xixón. Basada nel papel de les muyeres na fuelga minera d'Asturies de 1962, la cinta revive la fuelga al traviés de la vivencia d'Anita Sirgo y Constantina Pérez, dos lluchadores antifranquistes deteníes y torturaes naquellos meses. Amanda Castro dirixe esti trabayu que tien de protagonistes a los intérpretes Cristina Marcos, Ponce de León, Fernando Andina y Luis Callejo y qu'axunta historia y ficción pa desarrollar un relatu basáu en fechos reales y respetando la realidá de los fechos. Los pases d'esti trabayu van ser el xueves 29 a les 19:45 hores na sala 3 de los Cines Centro y el vienres 30 a les 17:00 hores nel Centru Municipal Xixón Sur-Pumarín.


Nesta xornada de xueves va poder vese tamién dientro de la sección "Esbilla" el documental "Fronteiras" dirixíu por Rubén Pardiñas y qu'aborda la cuestión de la identidá llingüística de los conceyos na raya ente Asturies y Galicia. Ente los testimonios que se recueyen na cinta pela parte gallega tán los de Xosé Lluis Méndez Ferrín, Xosé Manuel Beiras o Manuel Fraga, mientres que de la parte asturiana, falen la Presidenta de l'Academia de la Llingua Asturiana, Ana Cano y el que fuera Xefe de la Oficina de Política Llingüística nel momentu de facese'l documental, Ramón d'Andrés, ente otros. El documental va tener dos pases que van facese na sala 3 de los Cines Centro de Xixón, el 29 de payares a les 19:45 hores y el día 30 nel CMI Xixón-Sur, a les cinco la tarde.