Martínez Oblanca reprochó a Pastor nel Senáu la situación del Plan de Víes de Xixón

El senador Isidro Martínez Oblanca reprochó esti miércoles a la ministra Ana Pastor la situación del Plan de Víes de Xixón. Tamién criticó la esclusión d'Asturies del 'Plan Juncker'.

“Lo qu'asocedió en Xixón col so Plan d'Integración del Ferrocarril −un gran plan patrocináu dende l'año 2002 pol Estáu xunto coles operadores ferroviaries y l'alministración autonómica y local− supón ún de los capítulos más llamentables de la historia reciente d'Asturias. Doce años y mediu depués, el so Gobiernu, señora Pastor, toma decisiones que van en contra del ferrocarril. Nun hai precedente conocíu, non sólo n'España, sinón n'Europa, d'una xestión ferroviaria que s'aplica nel sentíu contrariu a los intereses que ta obligada a patrocinar y defender”, criticó'l representante de Foro na Cámara alta, que calificó de "llarguísima partida de ping-pong" ente'l PP y PSOE, esto ye l'Executivu estatal y nacional, la situación actual del Plan de Víes. D'igual forma, comparó la estación, en principio temporal, de Xixón cola intermodal de Vigo, "una ciudá mui similar a Xixón, a la que'l ministeriu facilitó los recursos económicos pa resolver la integración ferroviaria con una solución conforme colos tiempos".

Martínez Oblanca tamién amosó la so disconformidá cola esclusión d'Asturies del 'Plan Juncker' decidida pol Ministeriu de Fomentu. "Tamos ante una decisión política de gravedá estraordinara pola so repercusión económica y social. Falamos d'una infraestructura ferroviaria d'alta velocidá que se planificó nel añu 2000 por un Gobiernu del que vusté y el señor Rajoy formaben parte. Na llista de 60 proyeutos prioritarios la llínea Palencia-Xixón nun se presentara, lo que dexa ensin opciones al tramu ente La Pola Ḷḷena y Xixón”, y lleva a allargar "les carencies qu'anguaño yá tán sufriendo los asturianos y la so economía".

Manifestación el vienres

La Plataforma en Defensa de un Plan de Vías para Gijón tiene prevista una concentración esti vienres, a les 19 hores, na Plaza de L'Humedal pa protestar contra la indefinición del proyeutu. Esta convocatoria tien l'apoyu de la Federación de Asociaciones de Vecinos de Gijón y la Federación de Asociaciones de Vecinos Rurales de Gijón 'Les Caseríes' amás de toles formaciones polítiques con representación nel Conceyu a esceición del PP y dellos coleutivos sociales y sindicatos. Podemos, Equo, UPyD y Ciudadanos tamién amosaron el so sofitu a la convocatoria. Otra manera, Pastor fixo ayeri delles declaraciones nos que defendió la centralidá de la estación intermodal, una de les reivindicaciones principales de los vecinos.

Pue consultar la intervención completa de Martínez Oblanca nesti enllaz.