Marqués y Sánchez Vicente calecen máquines con vistes al 2007

Los presidentes de la Unión Renovadora Asturiana (URAS) y del Partíu Asturianista (PAS) Sergio Marqués y Xuan Xosé Sánchez Vicente, presentaron esta selmana nel oriente d'Asturies les sos prioridaes como coalición política nun actu que se desarrolló en Cangues d'Onís y nel que los dos líderes políticos repartieron propaganda na capital del conceyu y dempués en Benia y en Cabrales. Lo mesmo Marqués que Sánchez Vicente afitaron que la so coalición nun tien por únicu oxetivu'l de presentase a les elecciones del 2007 y que la so voluntá ye la de dambos partíos sigan xuntos indefinidamente.

Ente los puntos clave que defende la coalición y que van tar nel noyu del so programa electoral va rescamplar el de la reforma del estatutu d'autonomía, mientres que la dfensa de la sanidá pública asturiana y la meyora de la so xestión van ser tamién aspectos clave nel so discursu políticu xunto cola defensa de polítiques d'incentivu del emplegu y la oficialidá del asturianu.