Marea prieto de perdes nes Bolses

Tope tres tope'l preciu del petroleu ta poniendo ya en crisis al mundu occidental. Col nuevu preciu históricu penriba los 45 dólares el barril xunta les febles estadístiques macroeconómiques d'Estaos Uníos los inversores fuxen de la bolsa. El mieu a un corte del suministru enerxéticu y el frenu al xorrecimientu económicu mundial ponen nerviosa a la comunidá inversora.

Asina les bolses pesllaron en negativo mentanto que'l dólar tuvo una cayida mui abultada. L'Ibex-35 ta a un pasín d'entrar en perdes nel conxuntu del añu dempués d'un entamu del 2004 mui positivu.

Febles estadístiques que ponen duldes nel xorrecimientu económicu del mundu. El datu más importante de la selmana foi'l permal resultáu del paru d'Estaos Uníos. Mentanto que'l Departamentu d'Emplegu americanu contaba con 240.000 nuevos puestos de trabayu nel mes de xunetu sólo se crearon 32.000. El déficit y la delda de l'Alministración Bush son que xunta la desestabilización d'Oriente nun ayuden a crear un clima inversor y seguru.

Na Zona Euru destacó la estadística de la cayida del 1,9% de la producción industrial d'Alemaña, un datu mui negativu y nun esperáu polos economistes.

Wall Street tuvo cayíes mui abultaes. Los índices de Nueva York tocaron mínimos anuales y la inestabilidá y volatilidá reinaron nos mercaos del otru llau del Atlánticu. L'índiz Dow Jones tuvo una cayida del 1,48% hasta los 9.815,13 puntos. El tecnolóxicu Nasdaq tamién peslló a la baxa con una cayida del 2,46% hasta los 1.776,89 puntos.

Nel Vieyu Continente los resultaos nun pintaron meyor. Francfort y París foron les más afectaes con cayíes penriba'l 2,5%. Llondres cayó sobre'l 1,75% y ello col tirón del Barclays. Esti bancu inglés propietariu del Banco Zaragozano pasó de ser rival del Santander na compra del británicu Abbey a ser oxetu d'OPA pol parte del norteamericanu Citigroup.

Perdes y munches duldes na Bolsa de Madrid que punxeron al selectivu Ibex raspiando'l mínimu del añu dempués d'una cayida del 2%. Con 7.681,00 puntos l'Ibex ta mui perbaxo de la cota de los 8.000 puntos, y ello con un volume de negociu de 3.055 millones d'euros, un valor mui altu pa ser vacaciones. Más de venti valores perdieron penriba'l 2% con Sogecable de cabezaleru. Tamién tuvieron perdes el BBVA, Arcelor, Santander, Gamesa, Telefónica, Repsol y Acerinox. Rede Eléctrica y Enagás pesllaron ensin cambeos.

L'anuncia de la selmana foi la decisión del Gobiernu Zapatero de da-y relevu al octoxenariu Blas Calzada na Comisión Nacional del Mercáu de Valores (CNMV). Tamién se ruxe alrodiu de l'alministración ZP de los próximos nomes que van acutar sillones presidenciales de les empreses privatizaes. El superministru d'Economía Pedro Solbes ya dio anuncia de les duldes que tien sobre la "competencia técnica" de los presidentes de les empreses privatizaes. Too ello dempués d'anunciar el PSOE al ganar les elecciones que nun diba intervenir nel sector priváu y que diba respetar los conseyos d'alministración de les empreses que foron públiques nel so día.

El feble mercáu llaboral d'Estaos Xuníos tiró p'abaxo pel dólar pola desconfianza na fuercia de la primer economía mundial.

El más beneficiáu foi l'euru que s'asitió nos 1,227 dólares unidá. Los analistes tienen duldes alrodiu de si estos cambeos nos Estaos Xuníos van camudar el calandariu de xubes de tipos d'interés pola parte de la Reserva Federal. Nel mercáu de renta fixo los bonos tuvieron la selmana pasada una cayida de rentabilidá. Nel casu del bund alemán a diez años la rentabilidá algamó un 4,066%. Otramiente, l'oru foi tamién beneficiáu de la debilidá del dólar y recuperó parte de lo perdío nes últimes selmanes. El pieslle de la cotización de la onza d'oru asitióse nos 399,9 dólares, la mayor xuba nel últimu mes.