Mapi Quintana presenta n’Asturies la so propuesta de fusión de jazz y música asturiana

L'acabante de remocicar teatru Vital Aza de La Pola L.lena enllenóse ayeri pa contemplar la primer presentación del nuevu proyectu musical de Mapi Quintana n'Asturies. La cantante de jazz l.leniza, cola ventaya de xugar en casa, recibió'l sofitu incondicional d'un públicu entregáu y al que se-y fizo curtiu un recital que nun llegó a la hora de llargor incluyendo l'únicu "bis" que ficieron los artistes. Mapi Quintana y la so banda tocaron tolos temes compuestos per tierres d'Holanda pola vocalista y el so grupu, qu'amiesta músicos arxentinos, coreanos, alemanes y holandeses na puesta de llargo d'una propuesta musical pionera que quier fusionar el jazz cola música tradicional asturiana y na que la característica voz de Mapi, qu'introduz nel espectáculu tamién instrumentos tradicionales como la pandereta, xuega un papel central. Enantes de volver pa Holanda, onde desarrolla los sos estudios musicales, Mapi Quintana va dar un segundu conciertu mañana xueves nel Ca Beleño de Xixón. La cita ye a les 10 de la nueche nel conocíu local del barriu de fomentu.