Manuel García - Galano, nuevu académicu de la llingua

L'Academia de la Llingua Asturiana convoca'l Día de les Lletres asturianes pal próximu 5 de mayu. El recibimientu del escritor eonaviegu Manuel García - Galano como académicu d'honor va centrar un actu que va contar coles actuaciones del gaiteru Iñaki Sánchez Santianes, la cantante Bibiana Sánchez y el grupu de folk DRD. Otramiente, l'Academia tresllada de llugar pa esta XXVII edición del Día de les Lletres los actos oficiales, que, en cuenta del tradicional Teatru Campoamor, van llevase al tamién uvieín Teatru Filarmónica, asitiáu na hestórica Plaza Porlier.

Na solemne sesión académica, que va entamar a les 8 de la tarde, va tomar posesión como nuevu Miembru d'Honor de l'Academia l'escritor eonaviegu Manuel García Galano. L'Academia de la Llingua Asturiana anuncia que quier con esti reconocimientu "amosar el so compromisu irrenunciable cola asturianidá de les tierres del Navia-Eo y coles persones ya instituciones que trabayen pol caltenimientu de la cultura y la llingua d'Entrambasauguas".

Arriendes del tradicional discursu institucional de la Presidenta de l'Academia de la Llingua Asturiana, l'actu va abrise cola actuación del gaiteru Iñaki Sánchez Santianes y la cantante de tonada Bibiana Sánchez García; y va pesllase col grupu folk DRD.

L'Academia de la Llingua Asturiana, siguiendo'l facer entamáu la edición pasada, repite'l so brinde a los asistentes pa que, na midida de les sos posibilidaes, acudan al actu vistiendo'l traxe asturianu tradicional "de mou qu'ésti puea, pasu ente pasu, dir asitiándose nos actos más solemnes".