L'Uviéu pierde la imbatibilidá y el lideralgu nel Tartiere

El partíu vieno marcáu por un gol tempraneru y un ambiente d'enfadu na grada que paeció influyir nel desorde qu'amosó'l Real Uviéu nel campu. Cuando entovía nun se sentara la mayoría la xente, Romero consiguió un primer gol que diba marcar enforma´l restu del partíu. Yera'l minutu 5 y el xugador del Lealtad aprovechó la ocasión pa pidir el "non" a la constitución europea. Esti gol mancó-y muncho a un Uviéu que nunca nun supo xuga-y al equipu de La Villa que foi a parar l'ímpetu uvieín con seriedá defensiva y gran presión sobre la salida de Michu y Jon Carrera. Al Uviéu faltó-y cabeza pa superar la presión del Lealtad y abusó demasiao de la xugada individual, amás nes ocasiones que tuvo atopó siempre una gran rempuesta d'un destacáu Emi.

El Lealtad dexó bien claro que ye un gran equipu con xugadores de muncha esperiencia que saben lleer el partíu y forzar al máximu les llendes del reglamentu. Bien ordenáu atrás, foi quien a aprovechar una contra llevada por Armando, Romero y Cardín pa qu'esti últimu batiera a Ponzo.

Dempués d'esti gol, Rivas movió'l bancu y fizo un apueste totalmente ofensivu pero nun tuvo'l resultáu esperáu, quitando un tiru de Rubén que pegó na escuadra nun hubo munches ocasiones clares de gol. Siguió l'Uviéu intentando consiguir un gol que lu metiera nel partíu pero ésti nun llegó hasta'l minutu 92 por parte de Cervero, yera mui tarde anque'l partíu siguiera hasta'l minutu 100.

Dempués de trenta partíos, esta ye la primera derrota en tercera nel Tartiere d'un Uviéu que tendrá d'ameyorar el so xuegu y abstraese del entornu si quier ser campeón y llegar bien preparáu a la fase d'ascensu p'algamar l'únicu oxetivu d'esta temporada, consiguir l'ascensu de categoría a final d'añu.