L'Uviéu torna al fútbol profesional tres ganar nel Ramón de Carranza

Un gol de David Fernández tres un corner devolvió al Uviéu a Segunda División doce años depués. El restu d'equipos asturianos de les eliminatories d'ascensu fracasó nos sos oxetivos.

El central madrilanu remató de cabeza un corner llanzáu por Susaeta nel minutu 6 de la segunda parte provocando la llocura nel sector visitante del Ramón de Carranza y n'Uviéu. El gol pesó muncho nel Cádiz, que nun supo superar la defensa asturiana nos 40 minutos restantes y marcar el gol col que forzaría la prórroga. D'esta forma, l'Uviéu torna al fútbol profesional tres doce años d'ausencia.

L'equipu azul foi l'únicu de los asturianos que consiguió sacar alantre la so eliminatoria. L'Avilés ganó n'Elda 2-3, resultáu insuficiente pa remontar el 2-4 del Suárez Puerta, polo que los avilesinos baxen a Tercera División y afronten un futuru complicáu, más tres l'anuncia fecha güei de que John Clarkson abandona'l club. Na mesma categoría van continuar tamién Caudal, Vetusta y el CD Tuilla. Los mierenses cayeron nel Hermanos Antuña nos penatis col Haro (0-0 nos dos partíos), el filial oviedista perdió na prórroga col Arenas (2-0; 0-1 na ida) y el club de la cuenca del Nalón viose superáu pola mínima en la Pobla de Mafumet (1-0; 0-0 na ida).

Va tener una segunda oportunidá el Condal, por quedar campeón del grupu asturianu, tres perder col Rayo Majadahonda 3-0 (2-2 na ida). Esta tarde, a les 17 hores, va celebrase'l sortéu nel que se conocerá'l rival de los de Noreña na segunda fase de los play-offs d'ascensu a Segunda División B.