L'últimu sábadu d'agostu vien tremáu de propuestes

L'axenda d'ociu d'esti fin de selmana ábrese con una cita ineludible
pal sábadu: el Descensu Folklóricu del Nalón. Coincidiendo
coles fiestes patronales de La Pola Llaviana celébrase'l tradicional
Descensu nel que les carroces y los cachibaches flotantes intenten descender
peles agües del riu hasta'l puente La Chalana. Mientres en Xixón
tenemos la XVI Fiesta de la Sidra Natural. Durante tres díes
disfrútase de forma paralela del concursu de cantares asturianos,
numberosos puestos de sidra y productos derivaos de la mazana, prebes de baldre
y trataráse de batir el record mundial d'echao simultáneo que
l'añu pasáu foi quién reunir na playa de Poniente a un
total de 5.167 persones. El programa completu puede consultase
equí(pdf).
Tamién na Plaza Mayor allúgase'l II Concursu de Baille Asturiano
por Pareyes de Xixón durante tol fin de selmana.


Sicasí tamién el sábadu podemos averanos a "La
nueche + o - Celta" de Baíña (Mieres), que llega coles
actuaciones a partir de les 22:00 h.de los grupos asturianos Tejedor, Tuenda y
Patriband Orl.lestra Band más la propuesta de folk electrónicu de
los tamién asturianos "Axu". Tamién esti sábadu
celébrase la XXIV edición de la Noite Celta de Porcía (El
Franco) cola actuación de los asturianos "El Cabazo",
"Reina del Truebano", "Felpeyu", "La Col.la
Propinde" y el gaiteru escoces Fred Morrison.


A lo llargo de tol fin de selmana tamién tenemos el Mercáu de
Porrua nos que van presentase talleres en vivo, puestos d'artesanía,
bailles tradicionales, malabaristes, teatru, música..... Y yá
namás el domingu'l XXXVII Certame del Quesu Cabrales en Arenas, una
xornada festiva dedicada al rei de los quesos asturianos. Dende la
mañana podremos tastiar y comprar nos distintos puestos esti productu
asturianu con denominación d'orixe. El programa complétase a les
17.30 con un festival folclóricu, a les 20 horas con un concursu

d'echadores y a les 22 horas con una verbena. Munches mas actividaes pal ociu
na nuesa axenda.