Luis Argüelles recibe un emotivu homenaxe de compañeros y amigos

L’Arribada entamó esti martes un homenaxe a Luis Argüelles Sánchez pol so llabor de recuperación y estudiu de la cultura asturiana. Decenes de compañeros y amigos nun quixeron perder la oportunidá de da-y les gracies pola so trayeutoria.

L’actu taba previstu pa les 16.30 hores nel Centru Xerontolóxicu Xovellanos, anque’l so aniciu retrasóse dellos minutos pa poder sentir a Argüelles recordar aquellos primeros años del Muséu del Pueblu d’Asturies, del que fora responsable –al igual que del Muséu de la Gaita–, recintu mui especial y simbólicu –“que se concibió como una ciudá” – onde muncha xente acudía los domingos a comer, beber, sentir misa o baillar. “La xente diba feliz”, recordó Argüelles, de 82 años d’edá. Ente’l públicu, mui atentu a les pallabres del homenaxeáu, dexáronse ver cares conocíes como la edil socialista Carmen Veiga; Iñigo Noriega, direutor del diariu d’El Comercio; Fernando Fueyo, párrocu de San Nicolás de Bari y capellán del Sporting; el presentador Xurde Morán; o'l sindicalista históricu de la CSI, Luis Redondo –que tuvo una pallabres cariñoses pa con Argüelles nel tramu final del actu–, ente otros.

José Ramón Carreño, xerente del centru onde reside Argüelles anguaño, abrió darréu, en llingua asturiana, l’homenaxe y dio pasu a Alberto Álvarez Peña en representación de l’Asociación Cultural L’Arribada. L’etnógrafu mencionó los sos primeros recuerdos del Muséu del Pueblu d’Asturies y d’Argüelles, al mesmu tiempu que disculpó l’ausencia de Fonsu Fernández nel actu por enfermedá. Tamién de los trabayos que’l responsable de la instalación museística espublizaba nel diariu El Comercio sobre mitoloxía, instrumentos musicales o’l traxe del país, y que-y sirvieron pa dar continuidá les histories que sintiera en casa. “Trabayó muncho’l conceyu de Xixón y demostró que p’atopar histories mitolóxiques nun facía falta dir a les brañaes”, señaló Álvarez Peña, que destacó la del cuélebre San Llorienzu, que residía en La Providencia y “qu’estrozaba los preseos de los pescadores de Cimavilla”. “Fixo un gran llabor al recopilar estes histories y difundiles nun diariu”, aseguró.

El siguiente en tomar la pallabra foi Xuan Xosé Sánchez Vicente, encargáu de contar “les virtúes polítiques y parte de les personales” d’Argüelles. Asina, nun primer momentu, fixo referencia a los sos esfuercios, allá pel añu 1967, pa impulsar “con entusiasmu, el Pueblu d’Asturies, pa lo qu’había que sacar perres a la Cámara, a los Adaro y Bankunión” nun momentu nel que nun yerá fácil buscar financiación. Otra dificultá añadida yera “convencer a la xente pa crear un sitiu onde tener recoyíes les tradiciones materiales d’Asturies”. Argüelles salvó toes estes dificultaes y pronto punxóse a “recoyer los horros d’Ensidesa en Somonte y a pidir coses vieyes per Asturies, garrándoles con amor”.  

Entós llegaron unos años perbonos nel Muséu del Pueblu d’Asturies, con sidra y pinchos baxo l’horru; cuando s’entamó a celebrar la misa qu’atrayía a tanta xente a partir del 73, mesmu añu nel que tuvo llugar el primer concursu de narraciones n’asturianu, del que foi ganador Xosé Álvarez Fernández con ‘El bable de Xuanín’, recordó Sánchez Vicente. “El Pueblu d’Asturies creció muncho, hasta que llegaron los bárbaros” y destituyeron a Argüelles del cargu, quedando la instalación museística nel escaezu por una década. Nesti momentu, el políticu asturianista y escritor quinxo centráse nes virtúes personales públiques del homenaxeáu, yá que, “pese a los malos modos y les mui males maneres, nunca sentí d’él una crítica feroz, insultu o quexa”. Por último, destacó la so aportación “a la historia y cultura asturiana”.

Recuperación del traxe del país

Daniel García de la Cuesta, vistíu col traxe del país, punxo la nota musical del actu con la interpretación d’una pieza de Cabueñes recuperada por Argüelles que tocó con una bandurria y que l’homenaxeáu siguió cola la voz. Na so intervención, el músicu aprovechó la oportunidá p’agredece-y el trabayu que fixera pa la recuperación del traxe del país “porque, por él, deprendimos que nun yera un disfraz”.

En representación del Conceyu de Xixón acudieron al homenaxe Carlos Rubiera y Xosé Nel Riesgo. El conceyal d’Educación, Cultura, Mocedá y Festexos revivió aquellos años de mozu cuando conoció a Argüelles sirviendo-y culinos y tortilles nel bar familiar, L’Aldea, y lleía los sos artículos en Asturias Semanal o los estudios qu’espublizaba n’El Comercio. Por esi motivu, afirmó que pa él yera un arguyu “representar a tolos xixoneses pa face-y entrega d’una placa que reconoz simbólicamente lo muncho que-y debemos tolos asturianos como pueblu, pero sobre manera toda aquella xeneración del 80 que garró la so antorcha”, en referencia al asturianismu que medró naquellos tiempos. Pa finar, Riesgo fixo-y entrega “de les últimes publicaciones qu’el entamó”, en referencia a los llibros editaos pol Muséu del Pueblu d’Asturies, ente les que s’atopaba’l trabayu fechu por Alan Lomax nel país, y Álvarez Peña’l diploma que certifica a Argüelles como miembru honoríficu de L’Arribada. Mentes, García de la Cuesta zarró l’homenaxe con una pieza orixinal del Conceyu de Miranda a la gaita.

Na semeya, momentu nel que Carlos Rubiera entrega a Luis Argüelles en nome del Conceyu de Xixón una placa d’agradecimientu baxo la mirada atenta d’Alberto Álvarez Peña.

Comparte...                                    

Enllaz permanente