Lourdes Álvarez merez el III Premiu Nacional de Lliteratura Asturiana

|
Lourdes Álvarez

Depués de Xuan Bello y Xuan Xosé Sánchez Vicente, Lourdes Álvarez García conviértese na primer muyer en recibir el Premiu Nacional de Lliteratura Asturiana qu’entrega l’Academia de la Llingua Asturiana (ALLA) cada trés años. La poeta va recoyelu formalmente nel Campoamor nel XLIV Día de les Lletres Asturianes.

L’acta del xuráu xustifica la decisión de conceder esti reconocimientu a l’autora de La Güeria d’Urbiés “pola calidá d’una obra poética singular desarrollada ensin priesa, perriba de modes y corrientes, que crea un mundu lliterariu orixinal y propiu. Un mundu envueltu en tristura y sentimientu, pero qu’escuende, al empar, una voz fuerte qu’alluma la historia y el destín de la muyer. Una obra escrita siempres nuna llingua mui bien ellaborada, basada nel ciñu y el procuru col qu’escueye y afalaga unes pallabres que son a crear un mundu propiu que tresciende la realidá y que, ensin dulda, constitúi una perfeuta amuesa del valir estéticu y creativu de lo meyor de la lliteratura asturiana de güei”.

Nacida nel 1961, Lourdes Álvarez ye ún de los nomes más destacaos del nomáu Segundu Surdimientu. Na so obra atopamos poemarios como ‘Aldabes del olvidu’ (1991); ‘Cálices de la nueche’ (1992); ‘Mares d’añil’ (1992) gallardonáu ex aequo col II Teodoro Cuesta, que tamién llevaría 2 años depués, nesa ocasión en solitariu con ‘Como aquella que yeres’; ‘Mediando distancies’ (2006) y ‘P’anular los adioses’ (2018), col que ganó’l XIX Premios de la Crítica d'Asturies na estaya de poesía, mentes que tamién fixo traducciones como ‘Otto ye un rinoceronte’ (1990) d’Ole Lund Kirkegaard y ‘Un sudaca na corte y otros relatos’ (1993) de Daniel Moyano.

El vienres 5 de mayu, nel actu previstu a les 19 hores nel uvieín Teatru Campoamor por motivu del XLIV Día de les Lletres Asturianes, la mierense va recibir públicamente’l III Premiu Nacional de la Lliteratura Asturiana, que conlleva una recompensa de 5.000 euros y la entrega d’un medayón conmemorativu. El xuráu que falló esti honor tuvo compuestu polos miembros de númberu de l’ALLA Ana María Cano, Xosé Ramón Iglesias y Carmen Muñiz; los profesores de la Universidá d’Uviéu Carmen Alfonso y Leopoldo Sánchez; y Sánchez Vicente como ganador anterior, mentes que’l presidente de la institución, Xosé Antón González Riaño, presidió’l mesmu y Antón García, direutor xeneral de Política Llingüística, fixo’l llabor de secretariu.

Semeya obra d'Esther Muntañola.

Contador Estadistiques