Los trabayadores del Naval movilícense contra'l pieslle del astilleru

Trabayadores de Naval Xixón cortaron güei'l tráficu con barricaes de neumáticos ardiendo na primer movilización escontra'l zarru del astilleru. La plantilla decidió n'asamblea movilizase una hora enantes del conceyu previstu n'Uviéu ente los sindicatos UXT y CCOO y la Sociedá de Pesqueños y Medianos Empresarios en Reconversión Pymar pa negociar les condiciones del pieslle.


A l'asamblea de trabayadores asistieron representantes sindicales de CCOO y CSI. UXT ausentárase del comité d'empresa porque consideraba que les otres dos fuercies sindicales nun tán informando de manera clara a los trabayadores.
Tres l'asamblea, los trabayadores entamaron una marcha hasta la plaza Maximino González, onde cortaron el tráficu, provocando retenciones.


La voluntá de CCOO y CSI ye continuar cola convocatoria de movilizaciones pa oponesa a los planes de zarru del astilleru. Los sindicatos discrepen cola postura de Pymar en cuantes a la carga de trabayu porque consideren qu'hai agora suficientes contratos pa la construcción de barcos.
Pa CSI, Pymar "ta boicotiando cualquier posibilidá de que l'astilleru siga abiertu col oxetivu de quedar colos terrenos". La Corriente Sindical d'Izquierdes recuerda que, per parte de la empresa, nun se cumplieron nengún de los compromisos adquiríos. CSI insistió de la mesma manera en que se-y incluya na mesa de negociación, al contar colos representantes sindicales de CCOO y UXT.