Los trabayadores de la normalización píden-y a de Lorenzo que más compromisu col asturianu

Les declaraciones del Alcalde d'Uviéu Gabino de Lorenzo pidiendo más protección pal asturianu nun cayeron embaxo na FSA, pero tampoco en sectores comprometíos cola defensa del asturianu. Asina, l'Asociación de Trabayadores de la Normalización Llingüística emitió un comunicáu en que diz "allegrase de la preocupación que paez tener l'Alcalde d'Uviéu pol futuru del asturianu", anque llamenta "que les sos declaraciones nun se correspuendan colos fechos".



L'asociación que representa a los trabayadores de servicios de normalización del asturianu nos conceyos asegura que "la política que fai Gabino de Lorenzo n'Uviéu lleva precisamente a eso que tanto diz que-y preocupa, la desapaición irremediable de la llingua asturiana" y recomiénda-y que "de mano, lo primero que podía facer Gabino de Lorenzo ye pidir al so partíu que se posicione claramente a favor de la oficialidá de la llingua asturiana na próxima reforma del estatutu d'autonomía, porque ensin oficialidá l'asturianu nun tien nenguna opción de sobrevivir; y lo segundo ye facer una política llingüística seria nel so ámbitu d'actuación, que ye'l conceyu d'Uviéu".

Los normalizaadores aseguren que l'asturianu "nun se salva faciendo una esposición, gastando 7.000 euros nun premiu lliterariu o mandando a un conceyal a una manifestación pola oficialidá". En cuenta d'ello l'asociación alvierte que "la llingua sálvase defendiéndola dientro del propiu partíu y faciendo una política llingüística seria n'Uviéu; y paez que l'alcalde nun fai nenguna de les dos". Los normalizadores echen cuentes y declaren que "con bastante menos dineru de lo que se gasta na capital asturiana en toros, por poner un casu, yá se podía empezar a tomar midíes pa salvar un idioma que cada vez ta peor, y d'ello Uviéu ye un exemplu claru".