Los sindicatos píden-y a Educación que l’alternativa a llingua asturiana sía una asignatura de Cultura Asturiana “con conteníos”

Los sindicatos d'enseñanza apautaron, nuna reunión que tuvo llugar el pasaáu xueves n'Uviéu, solicitar a Educación que reconoza l'asignatura de "Cultura asturiana" como alternativa a la materia voluntaria de llingua asturiana na redacción del curriculum de primaria. La propuesta presentada a Educación, que contó col consensu de les organizaciones SUATEA, FETE-UXT y CC.OO, espresa tamién la refuga de les organizaciones y el profesoráu de llingua asturiana a la redacción orixinal del documentu curricular, que convertía al asturianun nuna materia optativa más en competencia con otres asignatures.

L'asamblea de profesores de llingua considera que la propuesta de la Conseyería supondría la desapaición de l'asignatura de lingua y que polo tanto, la única alternativa válida ye aquella qu'ayude a caltener y aumentar la matrícula n'asturianu, polo que l'asamblea decidió que lo "menos dañible" yera caltener "Cultura Asturiana" como materia opcional parquien nun escueya asturianu, anque, en cualquier casu, esta materia de cultura asturiana tendría de tener "conteníos" y un desarrollu más serios que los que tien hasta agora. CCOO, FETE-UXT y SUATEA piden amás que s'eliminen los ratios mínimos pa impartir la enseñanza, que s'aumente'l númberu d'hores y que l'asturianu llegue a ser lengua vehicular nel área del Conocimientu del Mediu. Xunto con estes midíes los sindicatos pidieron midíes pa la estabilidá del profesoráu, cola catalogación de los puestos de trabayu y la creación de la especialidá d'asturianu.

Fontes sindicales consultaes por Asturies.com espresáronse en términos pesimistes sobre les posibilidaes de llograr un reconocimientu dignu pal asturianu nel sistema educativu nel momentu actual. El fechu de que nun exista una negociación directa con Educación, que namás se llimitó a "recoyer propuestes" y el que la Conseyería de Riopedre nun se comprometa a retrucar nun plazu determináu pinten delles solombres nel procesu. Por de pronto, la única rempuesta por parte d'Educación a les protestes y la manifestación en demanda de la retirada del currículum consistió nuna amestadura al documentu orixinal qu'especifica que les alternatives a llingua nun podrán ser materia curricular.